Gjatë 24 orëve të fundit janë regjistruar 64 vatra zjarri, nga të cilat 24 mbeten aktive. Më shumë se 10 mijë forca emergjencash po punojnë në terren, nën koordinimin e Agjencisë së Mbrojtjes Civile, ndërsa operacionet vijojnë edhe nga ajri me helikopterë në Gramsh dhe Delvinë.
Vatrat më problematike:
Vlorë (Delvinë & Finiq) – Zjarri nga Syri i Kaltër ka prekur fshatra e banesa në Delvinë, ndërsa në Finiq vijon rreziku në zonën e Malit të Gjerë dhe Parkut të Rëzomës. Ndërhyrje tokësore dhe ajrore për izolimin e flakëve.
Elbasan (Gramsh) – Zjarret në Kullollas e Skënderbegas kanë marrë përmasa të mëdha, me një viktimë dhe dëme në banesa. Situata kritike.
Gjirokastër (Tepelenë) – Në Hormovë rreziku për banesat është shmangur, por në Turan janë djegur dy stalla dhe kafshë.
Shkodër (Fushë Arrëz) – Zjarri në Xeth po izolohet në një zonë me pisha.
Tiranë – Në Bërzhitë, Arbanë dhe Rrogozhinë janë shuar disa vatra, me dëme të konsiderueshme në sipërfaqe pyjore e banesa të pabanuara.
Dibër – Vatra në Malin me Gropa dhe Ternovë, larg zonave të banuara.
Korçë (Kolonjë) – Zjarri në pyjet me pisha të Gërmenjit po mbahet nën monitorim për shkak të terrenit të vështirë.
Rreziku vijon – Parashikohen temperatura të larta dhe erëra të forta, që mund të riaktivizojnë ose të krijojnë vatra të reja. Autoritetet u bëjnë thirrje qytetarëve të shmangin çdo veprim që mund të shkaktojë zjarr dhe të raportojnë menjëherë çdo situatë emergjente.
