Një operacion i karabinierëve italianë në provincën e Nuoros ka zbuluar një plantacion të fshehtë marijuane, të ndodhur në një bunker në zonën rurale të Gavoit, Sardenjë. Bunkeri ishte i ndërtuar nën tokë dhe fshihej mes shkëmbinjve, duke u arritur përmes një tuneli të gërmuar në terren. Brenda tij ishin instaluar pajisje moderne ndriçimi, sisteme ujitjeje, tubacione për qarkullimin e ajrit dhe një laborator për përpunimin dhe tharjen e bimëve, i lidhur në mënyrë të paligjshme me rrjetin elektrik.
Gjatë kontrollit, karabinierët sekuestruan rreth 100 bimë marijuane dhe pajisje për paketimin e drogës. Pranë bunker-it u gjetën gjithashtu pesë çanta me kokrra të thata kanabisi, njëzet pako hashashi dhe dy armë lodër të modifikuara për të ngjashmuar armët e vërteta.
View this post on Instagram
Në këtë aksion morën pjesë edhe ekspertët e laboratorit kriminalistik të RIS-it në Cagliari, të cilët konfirmuan potencialin e lartë narkotik të lëndës së sekuestruar. Po ashtu, njësia e specializuar e karabinierëve të Skuadrës Ajrore të Sardinës ndihmoi në identifikimin e hyrjeve të fshehta të bunker-it.
Për këtë rast janë arrestuar pronari i tokës, një 55-vjeçar, dhe djali i tij 21-vjeç, ndërsa vajza 29-vjeçare është proceduar në gjendje të lirë. Gjykata e Nuoros ka konfirmuar arrestimin dhe ka vendosur masën e arrestit shtëpiak për të dy meshkujt.
Çështja ndodhet ende në fazën paraprake të hetimeve dhe përgjegjësia përfundimtare e të dyshuarve do të përcaktohet gjatë gjykimit, ku nuk përjashtohen zhvillime të mëtejshme hetimore në favor të tyre.
