Më shumë se 900 tërmete kanë goditur një zinxhir ishujsh të largët dhe pak të populluar në Japoninë jugore gjatë dy javëve të fundit, duke i mbajtur banorët të shqetësuar dhe pa gjumë gjatë natës.
Aktiviteti sizmik ka qenë “shumë aktiv” në detin përreth ishujve Tokara që nga 21 qershori, njoftuan autoritetet pas një tërmeti me magnitudë 5.5 që goditi të mërkurën.
Nuk ka pasur raportime për dëme apo paralajmërime për cunami, por autoritetet u kanë kërkuar banorëve të jenë të përgatitur për evakuim nëse do të jetë e nevojshme.
“Është shumë frikësuese edhe të flesh gjumë,” i tha një banor transmetuesit rajonal MBC. “Ndjesia është sikur po dridhet gjithmonë.”
Zona e Tokarës ka përjetuar grupe tërmetesh edhe më parë, por sipas mediave lokale, frekuenca e lëkundjeve të fundit është e pazakontë.
Japonia është një nga vendet më aktive në botë për sa i përket tërmeteve, për shkak të pozicionit të saj në të ashtuquajturin “Unazë e Zjarrit e Paqësorit”, ku takohen shumë pllaka tektonike. Ajo përjeton rreth 1,500 tërmete në vit.
Rreth 700 persona jetojnë në shtatë nga 12 ishujt Tokara. Në disa prej këtyre ishujve të largët nuk ka spitale – më i afërti është të paktën gjashtë orë me traget nga kryeqyteti prefekturor, Kagoshima.
“Para se të fillojnë tërmetet, dëgjohet një zhurmë e çuditshme nga deti, sidomos natën. Është e frikshme,” tha Chizuko Arikawa nga ishulli Akusekijima për gazetën Asahi Shimbun.
“Të gjithë janë të lodhur. Thjesht duam që kjo të ndalet,” tha 54-vjeçarja, e cila jeton pranë detit dhe drejton një fermë bagëtish me bashkëshortin e saj.
“Pas kaq shumë tërmetesh, ndjehet sikur toka po dridhet gjithnjë,” tha Isamu Sakamoto, 60 vjeç, kryetar i shoqatës së banorëve lokalë në Akusekijima.
“Tërmetet fillojnë me një tronditje nga poshtë, pastaj shtëpia lëkundet. Të kthen stomakun përmbys,” shtoi ai.
Në fshatin Toshima, disa banorë janë pa gjumë dhe të rraskapitur, thanë autoritetet, duke i bërë thirrje mediave të ndalojnë së ngacmuari banorët me pyetje.
“Ju lutemi të tregoheni të kujdesshëm dhe të mos bëni pyetje apo intervista të tepërta,” thuhet në një njoftim në faqen zyrtare të fshatit.
Disa bujtina në ishujt Tokara kanë ulur qepenat për turistët për shkak të tërmeteve, njoftoi fshati Toshima në faqen e vet, duke shtuar se ato mund të përdoren si strehimore për banorët.
Frika nga tërmeti i madh
Kjo seri lëkundjesh ndodh ndërkohë që vendi ndodhet nën tension për shkak të lajmeve se një tërmet i madh dhe vdekjeprurës mund të godasë së shpejti.
Një libër komik nga artistja e mangave Ryo Tatsuki, i botuar në vitin 1999, ka ushqyer këto fjalë. Në një botim të ri të publikuar në 2021, ajo pretendonte se tërmeti i radhës i madh do të ndodhte më 5 korrik të këtij viti.
Këto spekulime kanë trembur disa turistë, dhe disa media kanë raportuar për një valë anulimesh udhëtimesh.
Shumica dërrmuese e tërmeteve që godasin Japoninë janë të lehtë, por disa shkaktojnë dëme të mëdha – si ai i vitit 2011 që shkaktoi cunami dhe vrau më shumë se 18,000 njerëz në bregun verilindor.
Megjithatë, autoritetet kanë frikë prej dekadash nga një tërmet i madh – një “super tërmet” që ndodh një herë në shekull, për të cilin shumë janë paralajmëruar që të vegjël. Sipas skenarëve më të këqij, ai mund të shkaktojë mbi 300,000 viktima.
Në fillim të kësaj jave, qeveria kërkoi masa të reja, si ndërtimi i digave dhe ndërtesave për evakuim, për të përforcuar gatishmërinë publike në rast të një katastrofe të tillë – por paralajmëroi se duhet bërë shumë më tepër./bbc
