Një tjetër episod i tensionuar në krizën SHBA-Iran është shënuar mbrëmjen e së hënës, teksa forcat iraniane kanë lëshuar raketa në drejtim të bazës amerikane Al-Udeid në Katar, në një përgjigje të drejtpërdrejtë ndaj bombardimeve amerikane mbi tre objekte bërthamore në Iran.
Sipas autoriteteve të Katarit, sulmi përbën një “shkelje flagrante” të sovranitetit të vendit dhe Doha rezervon të drejtën për të reaguar. Megjithatë, të gjitha raketat janë ndërprerë nga sistemet mbrojtëse ajrore, sipas Pentagonit, dhe nuk raportohet për viktima apo dëme serioze, as mes trupave amerikane, as mes qytetarëve katarezë.
Pamjet nga qielli i Katarit tregojnë gjurmët e mbrojtjes ajrore teksa neutralizojnë raketat në fluturim. Po ashtu, ambasada amerikane në Doha ka hequr urdhrin për strehim të menjëhershëm dhe do të rifillojë shërbimet normalisht të martën, ndonëse hapësira ajrore mbetet e mbyllur përkohësisht.
Në Uashington, Presidenti Donald Trump e cilësoi përgjigjen iraniane si “shumë të dobët”, duke thënë se “13 nga 14 raketat janë rrëzuar, ndërsa tjetra ka ndjekur një trajektore të padëmshme”. Në një postim në rrjetin e tij social Truth Social, ai theksoi se “asnjë amerikan apo katarez nuk është dëmtuar”, duke shtuar:
“Më e rëndësishmja, duket se ata e kanë nxjerrë gjithë mllefin nga sistemi i tyre. Shpresoj që të mos ketë më urrejtje. Ndoshta tani Irani mund të ecë drejt Paqes dhe Harmonisë në rajon”.
Trump ka falënderuar gjithashtu Iranin për “njoftimin e hershëm” para sulmit, ndërsa shprehu vlerësim për Emirin e Katarit për përpjekjet për paqe.
Kjo përballje vjen vetëm dy ditë pasi SHBA sulmoi me intensitet të lartë objektet bërthamore në Fordo, Natanz dhe Isfahan, pas pretendimeve për rritje të aktivitetit bërthamor iranian. Ndërkohë, edhe Izraeli ka deklaruar sulme të shumta ndaj objekteve iraniane, përfshirë rrugët hyrëse në Fordo dhe burgun famëkeq Evin.
Analistët ndërkombëtarë e shohin këtë si një reagim të kalkuluar nga ana e Iranit dhe një moment kyç për Trump, i cili tani për tani po promovon një ton paqeje, duke deklaruar:
“URIME BOTË, ËSHTË KOHA PËR PAQE!”
A do të jetë kjo një pikë kthese apo thjesht një pauzë taktike në një konflikt të rrezikshëm? Sytë e botës mbeten të ngulur në Lindjen e Mesme.
