Një zjarr i madh ka përfshirë fushën e grumbullimit të mbetjeve urbane në lagjen “24 Maji” në Vlorë, më datë 7 qershor 2025, rreth orës 12:18, për shkak të temperaturave të larta. Pas kësaj, sipas njoftimit zyrtar të Policisë së Vlorës, disa zyrtarë të bashkisë janë vënë nën hetim për neglizhencë në detyrë, pasi dyshohet se nuk kanë marrë masat e nevojshme për parandalimin dhe shuarjen në kohë të zjarrit, duke shkaktuar ndotje të mjedisit.
Në kuadër të hetimeve, janë proceduar penalisht Drejtori i Ndërmarrjes së Pastrimit pranë Bashkisë Vlorë, F. T., 31 vjeç, si dhe përgjegjësi i Bordit të Kullimit, A. S., 36 vjeç. Gjithashtu, janë në hetim edhe tre punonjës të këtij bordi: L. D., 56 vjeç, E. D., 27 vjeç dhe D. I., 35 vjeç, të cilët ushtronin detyrën e manovratorëve.
Policia bën me dije se veprimet hetimore janë në vijim, ndërkohë që pritet të përcaktohen edhe përgjegjësitë konkrete për dëmet e shkaktuara në mjedis.
“Specialistët për Hetimin e Krimeve në Komisariatin e Policisë Vlorë:
-referuan materiale në Prokurori dhe nisën procedimin penal për shtetasit F. T., 31 vjeç, me detyrë Drejtor i Ndërmarrjes së Pastrimit pranë Bashkisë Vlorë, A. S., 36 vjeç, përgjegjës i Bordit të Kullimit pranë Bashkisë Vlorë, L. D., 56 vjeç, E. D., 27 vjeç dhe D. I., 35 vjeç, të tre me detyrë manovratorë në ndërmarrjen e Bordit të Kullimit të Bashkisë Vlorë, pasi më datë 07.06.2025, rreth orës 12:18, në lagjen “24 Maji”, Vlorë, si pasojë e temperaturave të larta, ka rënë zjarr në fushën e grumbullimit të mbetjeve urbane dhe shtetasit e sipërpërmendur kanë neglizhuar kryerjen e detyrës, duke mos marrë masa në kohë për shuarjen e zjarrit, duke sjellë ndotje të mjedisit”, njofton policia e Vlorës./Balkanweb
