Drejtuesi Politik i Partisë Socialiste për Diasporën, Taulant Balla, ka publikuar mëngjesin e sotëm një video humoristike në rrjetet sociale, ku ironizon aleancën opozitare mes Partisë Demokratike dhe Aleancës për Shqipërinë Madhështore (ASHM), si dhe partitë e reja të vogla, duke e krahasuar me kukullat e njohura ruse prej druri, matrioshkat. Në video, ai mban në duar një të tillë, nga ku dalin disa bufë njëri pas tjetrit, nga më i madhi deri te më i vogli.
Përmes kësaj satire vizuale, ai synon të tregojë se, sipas tij, liderët dhe përfaqësuesit e opozitës janë “të gjithë njësoj”.
“Mirëmëngjes! Bufi dhe këta që kanë dalë prej tij janë të gjithë njëlloj. Janë të gjithë vegla dhe që të re kanë vetëm fytyrën dhe moshën, se nuk kanë asgjë të re tjetër,” shprehet Balla në video.
Ai kritikon mënyrën sesi janë përzgjedhur kandidatët për deputetë në koalicionin opozitar dhe te partitë e reja, duke i akuzuar për nepotizëm dhe mungesë transparence: “I patë kur bënë listat e deputetëve? E njëjta qasje. Bufi iku nga fituesit e primareve tek idhtarët e foltores, këta të tjerët i mbushën listat me baballarë e krushq.”
Duke e mbyllur videon me ironi, Balla thekson: “Kur them unë që këta janë të gjithë njëlloj, jo ju, ja shikoje. Ja, doni më? Ja prap tjetri, vazhdojmë. Ja prap, njëlloj janë të gjithë, s’ka më, mbaroi këtu. Më 11 maj mbarojnë të gjithë bufat. Ditë të mbarë.”
Gjatë turneut në diasporë që vazhdon këtë fundjavë në Frankfurt dhe Bruksel, Balla ka dhënë vazhdimisht mesazhin se e vetmja parti e ripërtëritur dhe që sjell oferta të reja është Partia Socialiste, numri 5 në fletën e votimit.
