Policia e Elbasanit, gjatë operacionit të koduar “Reagimi”, ka arrestuar një 32-vjeçar, i cili plagosi një shtetas me armë gjahu gjatë një konflikti për motive të dobëta. Autori, identifikuar si Ilir Dedja, me precedent të mëparshëm penal për vjedhje, u kap dhe u arrestua falë reagimit të menjëhershëm të forcave të rendit.
Në banesën e tij, Policia gjeti një armë zjarri automatike me silenciator, armën e gjahut me të cilën dyshohet se Dedja plagosi 53-vjeçarin B. B., si dhe municion luftarak. Armët u dërguan për ekzaminim në Institutin e Policisë Shkencore për të verifikuar nëse ishin përdorur në ngjarje kriminale të tjera.
Gjithashtu, një 35-vjeçar, A. M., është proceduar penalisht për moskallëzim të krimit, pasi dyshohet se ka pasur dijeni për ngjarjen dhe nuk ka informuar autoritetet.
I plagosuri, shtetasi B. B., është në kujdesin e mjekëve, jashtë rrezikut për jetën. Materialet procedurale i kaluan Prokurorisë për veprime të mëtejshme.
Njoftimi i policisë:
Plagosi me armë gjahu një shtetas, gjatë një konflikti për motive të dobëta, falë reagimit të menjëhershëm të Policisë identifikohet, kapet dhe vihet në pranga autori.
I arrestuari, me precedent të mëparshëm penal në fushën e vjedhjes.
Gjatë operacionit policor të koduar “Reagimi”, Policia i gjeti në banesë autorit të dyshuar një armë zjarri automatike me silenciatorë, armën e gjahut me të cilën dyshohet se plagosi 53-vjeçarin dhe municion luftarak.
Arma e zjarrit me silenciator u dërgua në Institutin e Policisë Shkencore për ekzaminim të mëtejshëm, për të parë nëse kjo armë është përdorur në ndonjë ngjarje kriminale të ndodhur më parë.
Procedohet penalisht dhe një 35-vjeçar, për moskallëzim të krimit.
Shërbimet e Komisariatit të Policisë Elbasan, si rezultat i veprimeve të shpejta operacionale dhe hetimore, menjëherë pas marrjes së njoftimit se një shtetas kishte shkuar në spital, për të marrë ndihmë mjekësore, i dëmtuar në këmbë, dyshuar me armë gjahu, kanë organizuar dhe finalizuar operacionin policor të koduar “Reagimi”.
Si rezultat i operacionit, u bë i mundur identifikimi, kapja dhe arrestimi në flagrancë i autorit të dyshuar, shtetasit Ilir Dedja, 32 vjeç, me precedent të mëparshëm penal në fushën e vjedhjes.
Nga veprimet hetimore dyshohet se 32-vjeçari, gjatë një konflikti për motive të dobëta, ka qëlluar me armë gjahu shtetasin B. B., 53 vjeç, i cili është në kujdesin e mjekëve, jashtë rrezikut për jetën.
Më tej, në vijim të veprimeve u referuan materialet në Prokurori ku nisi procedimi penal për shtetasin A. M., 35 vjeç, pasi dyshohet se ka patur dijeni për ngjarjen dhe nuk ka kallëzuar.
Materialet procedurale i kaluan Prokurorisë, për veprime të mëtejshme.
