Departamenti Grek i Anti-Drogës, në bashkëpunim me agjencinë DEA amerikane, ka bllokuar një ngarkesë prej 17 kilogramësh kokainë të pastër, e destinuar për Athinën.
Sipas deklaratës së policisë greke, organizata kriminale synonte të importonte drogën nga Amerika Latine, duke përdorur si pikë ndalimi një aeroport europian. Burimet e policisë së Athinës konfirmojnë se agjentët grekë ishin informuar paraprakisht për këtë tentativë.
Operacioni rezultoi në arrestimin e Josif Samkës, një 30-vjeçar i lindur në vitin 1995, i cili ka pasur dënime të mëparshme për trafik droge. Pas zbritjes në aeroportin e Athinës, ai tërhoqi dy valixhe që përmbanin substancën narkotike dhe u mbikëqyr nga afër nga autoritetet. Jashtë terminalit, ai u takua me Pajtim Gëzim Kaleshin, një shtetas shqiptar i lindur në vitin 1997, dhe të dy u futën në makinën e këtij të fundit. Policia ndërhyri menjëherë duke arrestuar të dy individët.
Gjatë kontrollit të valixheve, u gjetën 16 pako që përmbanin 17 kilogramë kokainë të pastër, një telefon celular dhe 590 euro në para të gatshme. Hetimet konfirmuan gjithashtu praninë e një shtetasi tjetër shqiptar, me inicialet A.S., i cili është shpallur në kërkim.
Sipas policisë greke, ka dyshime se organizata kriminale ka realizuar më parë aktivitete të ngjashme trafikimi, por në sasi më të vogla. Dy të ndaluarit do të paraqiten në gjykatë për shqyrtimin e masave të sigurisë.
