Vetëm 90 minuta deri në dy orë stërvitje me pesha në javë mund të reduktojnë ndjeshëm rrezikun e vdekjes së parakohshme, sipas një studimi të publikuar në British Journal of Sports Medicine.
Studiuesit analizuan të dhëna nga tre kërkime afatgjata që përfshinin 147 mijë burra dhe gra mbi moshën 30 vjeç. Rezultatet treguan se personat që kryenin rregullisht ushtrime force kishin 13% më pak gjasa të vdisnin herët nga çdo shkak.
Përfitimet ishin edhe më të mëdha për sëmundjet kardiovaskulare. Rreziku i vdekjes nga infarkti apo goditja në tru rezultoi 19% më i ulët te ata që stërviteshin me pesha. Ndërkohë, rreziku i vdekjes nga sëmundje neurologjike, përfshirë demencën, ishte 27% më i ulët.
Ekspertët theksojnë se rezultatet më të mira u vunë re te personat që kombinonin stërvitjen me pesha me aktivitet aerobik si ecja, vrapi, çiklizmi ose noti. Në këtë grup, rreziku i vdekjes së parakohshme u ul deri në 58%.
Megjithatë, studimi zbuloi se përfitimet nuk rriten ndjeshëm pas dy orësh stërvitje force në javë, duke sugjeruar se edhe një angazhim relativisht i vogël mund të sjellë rezultate të rëndësishme për shëndetin.
Trajnerët e fitnesit dhe specialistët e shëndetit thonë se ushtrimet me pesha ndihmojnë jo vetëm në forcimin e muskujve dhe kockave, por edhe në kontrollin e sheqerit në gjak, përmirësimin e metabolizmit, uljen e dhimbjeve të kyçeve dhe ruajtjen e funksioneve njohëse të trurit.
Sipas ekspertëve, aktiviteti fizik me fokus forcën po bëhet një mjet gjithnjë e më i rëndësishëm për plakjen e shëndetshme, ruajtjen e pavarësisë në moshë të thyer dhe uljen e presionit mbi sistemet shëndetësore.
