Një foshnjë palestineze 7-muajshe është vrarë, ndërsa prindërit e saj kanë mbetur të plagosur pasi ushtarët izraelitë hapën zjarr ndaj automjetit me të cilin po udhëtonin në Bregun Perëndimor të pushtuar.
Sipas Ministrisë palestineze të Shëndetësisë, Sam Fahd Abu Haykal ndodhej në makinë me prindërit e tij pranë qytetit të Hebronit kur automjeti u qëllua nga forcat izraelite. Foshnja humbi jetën në vendngjarje, ndërsa të dy prindërit u plagosën.
Gjyshja e foshnjës, Firyal Abu Haykal, deklaroi se një plumb goditi automjetin dhe i mori jetën fëmijës.
“Ngjarja është e pabesueshme dhe e papranueshme. Po dëmtohemi vetëm sepse kemi vendosur të qëndrojmë në shtëpitë tona”, tha ajo për Reuters.
Nga ana tjetër, Forcat Mbrojtëse të Izraelit (IDF) deklaruan se ushtarët kishin perceptuar një automjet që po afrohej me shpejtësi drejt pozicionit të tyre. Sipas ushtrisë izraelite, një ushtar qëlloi një herë drejt automjetit.
Në deklaratën zyrtare, IDF pranoi se personat e lënduar ishin “civilë të papërfshirë” dhe njoftoi se incidenti është duke u hetuar.
Ngjarja ka shkaktuar reagime të forta në territoret palestineze, ndërsa funerali i foshnjës u zhvillua të shtunën në Hebron.
Ky nuk është rasti i parë i tillë. Në muajin mars, sipas autoriteteve palestineze, katër anëtarë të një familjeje, mes tyre dy fëmijë 5 dhe 7 vjeç, u vranë nga të shtënat e ushtarëve izraelitë në Bregun Perëndimor.
Incidenti vjen në një periudhë tensionesh të vazhdueshme në Bregun Perëndimor, ku përplasjet mes forcave izraelite dhe palestinezëve janë shtuar ndjeshëm gjatë muajve të fundit.
