Autori i dyshuar i sulmit në Paradën e Krenarisë në Berlin është vrarë nga policia, duke i dhënë fund një operacioni të gjerë kërkimi që nisi pas ngjarjes së rëndë.
Sipas autoriteteve gjermane, 21-vjeçari Abdul Ballout, shtetas gjerman me origjinë libaneze, u qëllua për vdekje në lagjen Spandau, pasi sulmoi efektivët me thikë gjatë përpjekjes për arrestimin e tij.
Ai dyshohet se mbrëmjen e së shtunës drejtoi një furgon drejt turmës pranë parkut Tiergarten në Berlin, duke vrarë një grua dhe plagosur të paktën 29 persona. Pas përplasjes me automjet, sipas policisë, ai sulmoi edhe disa persona me thikë.
Ministri i Brendshëm i Gjermanisë, Alexander Dobrindt, deklaroi se provat tregojnë se bëhet fjalë për një sulm të mundshëm terrorist me motiv islamist.
Sipas prokurorisë, Ballout kishte një histori kriminale dhe ishte i njohur për autoritetet. Në vitin 2025 ai udhëtoi drejt Libanit me synimin për t’iu bashkuar grupit terrorist ISIS në Siri. Ai u arrestua në Liban dhe më pas, pas kthimit në Gjermani, u dënua për përgatitje të një akti të rëndë dhune që rrezikonte sigurinë e shtetit.
Pas sulmit, kancelari Friedrich Merz vizitoi vendngjarjen dhe deklaroi se Gjermania nuk do të lejojë që “helmi i terrorizmit” të cenojë lirinë dhe mënyrën e jetesës së vendit.
Autoritetet kanë rritur nivelin e gatishmërisë për sigurinë, ndërsa po rivlerësohen masat mbrojtëse për aktivitetet publike në të gjithë Gjermaninë.
