Një studim i ri shkencor ka zbuluar se macet mund të luajnë një rol të rëndësishëm në kërkimet për trajtimin e kancerit tek njerëzit.
Sipas studimit të publikuar në revistën prestigjioze Science, studiuesit analizuan mostrat tumorale të afro 500 maceve shtëpiake dhe identifikuan ngjashmëri të rëndësishme gjenetike me format e kancerit që prekin njerëzit.
Shkencëtarët zbuluan se një nga gjenet më të rëndësishme që lidhet me zhvillimin e tumoreve, i njohur si FBXW7, paraqet mutacione të ngjashme si tek macet ashtu edhe tek njerëzit. Tek macet ky gjen u gjet shpesh i ndryshuar në tumoret e gjirit, ndërsa tek njerëzit mutacionet e tij lidhen me forma më agresive të kancerit të gjirit.
Studiuesja Louise van der Weyden e cilësoi këtë zbulim si një mundësi unike për të ndihmuar njëkohësisht dy specie.
Ekspertët shpresojnë se rezultatet e studimit do të kontribuojnë në zhvillimin e trajtimeve më efektive për kancerin tek macet, por edhe në kuptimin më të mirë të sëmundjes tek njerëzit.
Sipas autorëve të kërkimit, studimi i tumoreve tek macet mund të ndihmojë shkencëtarët të identifikojnë mekanizma të rinj biologjikë dhe të zhvillojnë terapi inovative kundër kancerit.
“Ka një përfitim të dyfishtë, një fitore si për macet ashtu edhe për njerëzit”, tha patologu veterinar Geoffrey Wood, një nga autorët e studimit.
Studiuesit theksojnë se kërkimi nuk sugjeron se macet shkaktojnë kancer tek njerëzit, por se ato mund të shërbejnë si modele të vlefshme për studimin e sëmundjes dhe zhvillimin e trajtimeve të reja./Washington post
