
Sipas burimeve nga Operatori i Shpërndarjes së Energjisë Elektrike (OSHEE), të cituara nga Report TV, ndërprerja është shkaktuar nga stakimi i një fideri që furnizonte me energji elektrike zonën ku ndodhet godina e Parlamentit.
Pas konstatimit të problemit, ekipet teknike kanë ndërhyrë menjëherë, duke aktivizuar një fider tjetër për të rikthyer furnizimin me energji.
Ndërprerja nuk ka prekur vetëm ambientet e Kuvendit, por edhe zonën përreth tij.
Megjithatë, ajo që ngre pikëpyetje është fakti se godina e Parlamentit është e pajisur me sisteme rezervë për furnizimin me energji elektrike, përfshirë gjeneratorin dhe UPS-in, i cili shërben për të siguruar furnizim të pandërprerë në rast defektesh në rrjet.
Në kushte normale, këto pajisje duhet të mundësojnë vazhdimin e furnizimit me energji edhe kur ndërpritet linja kryesore.
Pavarësisht kësaj infrastrukture, gjatë seancës plenare u regjistrua një ndërprerje e dukshme e energjisë.
Deri tani nuk është sqaruar përse sistemi UPS nuk arriti të parandalonte ndërprerjen, ndërsa nuk ka një shpjegim zyrtar nëse bëhet fjalë për defekt teknik, mosaktivizim të sistemit rezervë apo një problem tjetër.
Ngjarja ka nxjerrë në pah pikëpyetje mbi funksionimin e sistemeve të sigurisë energjetike në një nga institucionet më të rëndësishme shtetërore.
Ndërprerja ndodhi gjatë një seance parlamentare të karakterizuar nga debate të forta politike mes mazhorancës dhe opozitës për projektbuxhetin dhe paketën fiskale të vitit 2027.






