
Kryeministri Edi Rama merr pjesë këtë të enjte, më 19 nëntor, në takimin e nivelit të lartë të “Koalicionit të Vullnetmirëve” (Coalition of the Willing), që zhvillohet në Berlin të Gjermanisë.
Kreu i qeverisë shqiptare është ftuar nga kancelari gjerman Friedrich Merz për të marrë pjesë në këtë takim, i cili do të mbahet në ambientet e Kancelarisë Federale Gjermane.
Takimi zhvillohet në kuadër të bashkëpunimit ndërkombëtar për çështjet e sigurisë, paqes dhe stabilitetit në Europë.
Pjesëmarrja e kryeministrit shqiptar në këtë forum synon të riafirmojë angazhimin e Shqipërisë në bashkëpunimin me partnerët strategjikë dhe aleatët europianë për përballimin e sfidave të sigurisë.
“Koalicioni i Vullnetmirëve” është një nismë bashkëpunimi mes vendeve partnere që synon të koordinojë mbështetjen për Ukrainën dhe përpjekjet për krijimin e garancive të sigurisë në kuadër të një zgjidhjeje të qëndrueshme të konfliktit me Rusinë.
Shqipëria, si vend anëtar i NATO-s dhe kandidat për anëtarësim në Bashkimin Europian, ka mbështetur vazhdimisht Ukrainën dhe ka marrë pjesë në nismat ndërkombëtare për sigurinë europiane.
Takimi në Berlin përbën një tjetër angazhim diplomatik të Shqipërisë në diskutimet për sigurinë dhe stabilitetin e kontinentit.
Në njoftimin për pjesëmarrjen e Ramës nuk jepen hollësi për rendin e ditës, pjesëmarrësit e tjerë apo vendimet që mund të merren gjatë takimit.






