Kreu i grupit parlamentar të Partisë Socialiste, Taulant Balla, ka ngritur akuza të rënda ndaj Partisë Demokratike, duke pretenduar se deputetë të opozitës kanë paguar nga 100 mijë lekë për persona të maskuar që kanë ushtruar dhunë gjatë protestave. Ai deklaroi gjithashtu se 115 persona të kërkuar për zjarrvënie strehohen në selinë e PD-së dhe akuzoi Sali Berishën se kishte organizuar një tentativë për djegien e selisë socialiste.
Në një deklaratë për mediat jashtë Kuvendit, pas tensioneve që shoqëruan seancën plenare, Balla fajësoi opozitën për pengimin e zhvillimit normal të punimeve parlamentare.
“A ka deputetë të PD që kanë paguar 100 mijë lekë për kokë për të udhëzuar dhunë? 115 të kërkuar për zjarrvënie strehohen në selinë e PD”, deklaroi Balla, duke u kërkuar gazetarëve t’i drejtohen Prokurorisë së Tiranës.
Kreu i grupit socialist nuk paraqiti gjatë deklaratës prova konkrete për pagesat e pretenduara apo për strehimin e personave në kërkim.
Balla: Berisha tentoi të digjte selinë e PS-së
Balla iu përgjigj edhe akuzave të Sali Berishës, i cili më herët kishte pretenduar se kryeministri Edi Rama kishte organizuar një skenar për djegien e selisë së Partisë Demokratike.
Sipas Ballës, ishte pikërisht Berisha ai që kishte planifikuar sulmin ndaj selisë së socialistëve.
“Sali Berisha është instruktori i goditjes së PS. E dinim që Berisha do të dërgonte njerëzit e vet për ta djegur”, u shpreh ai.
Balla deklaroi se tentativa nuk pati sukses dhe e lidhi përplasjen politike edhe me zgjedhjet e ardhshme.
“Jo vetëm që s’ka për ta djegur, por PS do ta mundë në 2027 dhe 2029”, tha kreu i grupit parlamentar socialist.
“Kuvendi nuk do të humbasë asnjë seancë”
Pavarësisht tensioneve në Parlament, Balla theksoi se mazhoranca nuk do të lejojë ndërprerjen e procesit ligjvënës.
Ai deklaroi se Shqipëria ka një objektiv të rëndësishëm për mbylljen e negociatave të anëtarësimit në Bashkimin Europian gjatë vitit 2027, për të cilin, sipas tij, nevojitet miratimi i rreth 250 ligjeve.
“Kuvendi i Shqipërisë nuk do të humbë qoftë edhe një seancë të vetme për vendime të tjera”, deklaroi Balla
Ai i ftoi kundërshtarët politikë të matin mbështetjen e tyre në zgjedhjet vendore të vitit 2027 dhe më pas në zgjedhjet parlamentare të vitit 2029.
Mbështetje për policinë, kërkon verifikim të ankesave
Balla mbrojti veprimet e Policisë së Shtetit gjatë protestave, duke theksuar se institucioni ka detyrimin të garantojë sigurinë e qytetarëve dhe të mbrojë institucionet.
Ai deklaroi se ankesat për sjelljen e efektivëve janë në verifikim nga Agjencia e Mbikëqyrjes Policore.
Kreu i grupit socialist kërkoi gjithashtu reagim më të fortë institucional ndaj akteve të dhunës, duke përmendur sulmet ndaj Gjykatës së Lartë dhe Bankës së Shqipërisë.
“Është e papranueshme që fëmijë 17-vjeçarë të përdoren për dhunë”, theksoi Balla.
Deklaratat e tij vijnë pas një seance parlamentare të shoqëruar me përplasje fizike dhe bllokim të foltores, ndërsa akuzat e ndërsjella mes PS-së dhe PD-së për organizimin e dhunës gjatë protestave vijojnë të përshkallëzohen.
