Gjigantët botërorë të industrisë ushqimore kanë ngritur të paktën 239 procese gjyqësore kundër qeverive për të bllokuar ose vonuar ligje që synojnë mbrojtjen e shëndetit publik. Këtë e zbulon një hetim ndërkombëtar i koordinuar nga Lighthouse Reports, me pjesëmarrjen e disa mediave dhe organizatave investigative nga Europa, Amerika Latine dhe Azia.
Sipas hetimit, nga viti 2010 deri në vitin 2025, kompani si Coca-Cola, PepsiCo, Ferrero, Mondelez, Danone, Kellogg’s dhe Mars kanë sfiduar në gjykata rregullore që lidhen me etiketimin ushqimor, taksat për pijet me sheqer dhe kufizimet për reklamimin e ushqimeve ultra të përpunuara.
Rreth 68% e padive kanë pasur si objekt ndalimin e etiketimit paralajmërues në paketimet e produkteve, një masë që konsiderohet nga ekspertët si një nga mjetet më efektive për të orientuar konsumatorët drejt zgjedhjeve më të shëndetshme.
Hetimi tregon se Coca-Cola kryeson listën me 24 padi të drejtpërdrejta, e ndjekur nga PepsiCo me 17. Në listë renditen edhe Mondelez, Danone, Kellogg’s dhe Ferrero, të cilat kanë kundërshtuar në mënyra të ndryshme politikat e shëndetit publik.
Meksika rezulton vendi më i goditur nga ofensiva ligjore e industrisë ushqimore, me 193 nga 239 rastet e dokumentuara. Sipas hetimit, kompanitë kanë përdorur procese gjyqësore për të vonuar hyrjen në fuqi të etiketave paralajmëruese dhe rritjen e taksave për ushqimet dhe pijet me përmbajtje të lartë sheqeri.
Raporti thekson se kompanitë argumentojnë se mbështesin objektivat e shëndetit publik, por reagojnë me padi sa herë që qeveritë miratojnë masa detyruese që mund të ndikojnë në shitjet e tyre.
Ferrero, në një reagim për autorët e hetimit, deklaron se mbështet politikat për uljen e obezitetit dhe etiketimin ushqimor të bazuar në prova shkencore, por sqaron se ndërhyrjet e saj ligjore kanë pasur si synim qartësimin e mënyrës së zbatimit të rregulloreve dhe jo kundërshtimin e objektivave të shëndetit publik.
Hetimi vëren se, megjithëse kompanitë kanë humbur rreth 82% të proceseve gjyqësore në vendet e analizuara, ato vazhdojnë të investojnë burime të mëdha financiare në betejat ligjore dhe aktivitetet e lobimit, duke ushtruar ndikim të konsiderueshëm mbi politikat publike në mbarë botën.
