Presidenti amerikan Donald Trump ka kërcënuar Bashkimin Evropian me vendosjen e tarifave të reja doganore, pas gjobës prej 890 milionë eurosh që Komisioni Evropian i vendosi Google për shkelje të rregullave të konkurrencës.
Në një postim në platformën Truth Social, Trump e cilësoi vendimin e Brukselit si “të paligjshëm” dhe “jashtëzakonisht joetik”, duke paralajmëruar se Bashkimi Evropian do të përballet me pasoja ekonomike.
“Evropa do të paguajë një çmim shumë të lartë për këtë sjellje,” shkroi ai.
Administrata amerikane njoftoi se do të nisë një hetim sipas Nenit 301 të Ligjit të Tregtisë të vitit 1974, i cili i lejon Uashingtonit të ndërmarrë masa, përfshirë vendosjen e tarifave, ndaj vendeve që konsiderohen se zbatojnë praktika tregtare diskriminuese.
Nga ana tjetër, Komisioni Evropian argumenton se Google ka shkelur rregullat e Aktit të Tregjeve Digjitale (DMA), duke favorizuar shërbimet e veta në motorin e kërkimit dhe duke kufizuar konkurrencën në Google Play.
Përplasja rrezikon të thellojë tensionet tregtare mes SHBA-së dhe Bashkimit Evropian, në një kohë kur marrëdhëniet ekonomike mes dy palëve janë tashmë nën presion.
