Zvicra ka siguruar një vend në fazën e 1/8-ave të Kupës së Botës 2026, pasi mposhti me rezultatin 2-0 Algjerinë, duke regjistruar fitoren e parë në fazën me eliminim direkt të Botërorit pas plot 88 vitesh.
Në sfidën e zhvilluar në Vancouver, helvetët kaluan në avantazh që në minutën e 10-të. Johan Manzambi realizoi një aksion spektakolar në krah, kaloi mbrojtësin Aissa Mandi dhe shërbeu për Breel Embolo, i cili nuk gaboi përballë portës.
Vetëm 46 sekonda pas nisjes së pjesës së dytë, Dan Ndoye dyfishoi shifrat me një finalizim të saktë brenda zonës, duke vulosur kualifikimin e Zvicrës.
Algjeria pati pak raste për të reaguar, me mundësinë më të mirë që erdhi nga Fares Chaibi në pjesën e parë, por portieri Gregor Kobel priti pa vështirësi.
Fitorja shënon suksesin e parë të Zvicrës në një ndeshje me eliminim direkt të Kupës së Botës që nga viti 1938, kur eliminoi Gjermaninë. Gjithashtu, është hera e parë që helvetët shënojnë më shumë se një gol në një ndeshje të fazës me eliminim direkt që prej Botërorit të vitit 1954.
Në qendër të vëmendjes ishte 20-vjeçari Johan Manzambi, i cili regjistroi asistin e dytë në këtë Botëror. Sipas Opta, ai është futbollisti i parë zviceran që përfshihet direkt në pesë gola në një Kupë Bote që nga fillimi i regjistrimit të statistikave në vitin 1966, duke u bërë gjithashtu lojtari më i ri që arrin këtë shifër për çdo kombëtare në këtë periudhë.
Në fazën e 1/8-ave, Zvicra do të përballet me fituesen e çiftit Kolumbi–Ganë.
