Komisioni Europian ka miratuar shpërndarjen e 158.9 milionë eurove nga Plani i Rritjes për Shqipërinë, Maqedoninë e Veriut dhe Malin e Zi, ku Shqipëria përfiton 49 milionë euro. Sipas KE-së, fondet lidhen me periudhën e tretë gjashtëmujore të reformave dhe janë miratuar pas vlerësimit pozitiv të hapave të ndërmarrë nga Shqipëria në konkurrueshmërinë e biznesit dhe inovacionin. Një pjesë e fondeve do të kalojë në buxhetin e shtetit, ndërsa pjesa tjetër do të financojë projekte infrastrukturore në transport, energji të pastër, digjitalizim dhe kapital njerëzor në kuadër të Kornizës së Investimeve për Ballkanin Perëndimor.
