Një nga drejtuesit më të rëndësishëm të ISIS është vrarë gjatë një operacioni të përbashkët mes forcave amerikane dhe ushtrisë së Nigerisë në rajonin e Liqenit Çad.
Presidenti i Nigerisë, Bola Tinubu, konfirmoi se Abu-Bilal al-Minuki u eliminua bashkë me disa nga bashkëpunëtorët e tij gjatë një sulmi ndaj kompleksit ku strehohej.
Operacioni u njoftua fillimisht nga presidenti amerikan Donald Trump, i cili e përshkroi al-Minukin si “numrin dy të ISIS në nivel global” dhe “terroristin më aktiv në botë”.
Sipas autoriteteve amerikane, al-Minuki ishte shpallur terrorist global që në vitin 2023 dhe konsiderohej një nga figurat më të rëndësishme të organizatës terroriste në Afrikë dhe rajonin e Sahelit.
Ushtria nigeriane deklaroi se operacioni u realizua falë bashkëpunimit të ri strategjik dhe shkëmbimit të inteligjencës mes SHBA-së dhe Nigerisë.
Rajoni i Liqenit Çad, që shtrihet mes Nigerisë, Çadit, Nigerit dhe Kamerunit, prej vitesh është bastion i Boko Haram dhe grupit rival ISWAP, dega e ISIS në Afrikën Perëndimore.
Sipas hetimeve, al-Minuki kishte qenë më parë komandant i Boko Haram para se grupi të shpallte besnikëri ndaj ISIS në vitin 2015.
Autoritetet e lidhin emrin e tij edhe me rrëmbimin famëkeq të mbi 100 nxënëseve në Dapchi në vitin 2018.
Presidenti Trump deklaroi se eliminimi i tij përbën një goditje të rëndë për rrjetin global të ISIS dhe strukturat e financimit të organizatës terroriste.
