Rritja e çmimit të naftës në 224 lekë për litër ka ngritur alarmin tek ekspertët e ekonomisë dhe bujqësisë, të cilët paralajmërojnë pasoja të rënda për prodhimin vendas. Sipas tyre, sektori më i goditur është bujqësia, ku kostot pritet të rriten deri në 50%, duke rrezikuar edhe blegtorinë dhe peshkimin.
Eksperti Eduart Gjokutaj duke folur në Report TV theksoi se nuk bëhet fjalë vetëm për rritje të kostos së transportit, por për një krizë të plotë prodhimi që prek të gjithë zinxhirin ushqimor. Ai kërkon masa urgjente nga qeveria, duke propozuar uljen e tre taksave kryesore: TVSH-së, akcizës dhe taksës së qarkullimit.
Nga ana tjetër, eksperti i bujqësisë Eduart Sharka e cilëson situatën si pasojë të politikave të dobëta, duke kritikuar heqjen e subvencionit të naftës për fermerët pikërisht në momentin më kritik. Sipas tij, kjo do të çojë në ulje të prodhimit vendas dhe rritje të varësisë nga importet.
Vendimi i Bordit të Transparencës për çmimin e naftës ka sjellë debate, pasi pavarësisht uljes së akcizës, çmimi real me taksa arrin deri në 233 lekë/litër. Ekspertët kërkojnë më shumë transparencë dhe politika më fleksibël për të përballuar krizën.
Nëse situata vijon, paralajmërohet rritje e mëtejshme e çmimeve të ushqimeve dhe humbje e sovranitetit ushqimor në vend.
