Kryeministrja e Italisë, Giorgia Meloni, ka pësuar humbjen e parë të rëndësishme politike, pasi referendumi për reformën kushtetuese në drejtësi u rrëzua nga votuesit.
Sipas rezultateve, rreth 54% e qytetarëve votuan kundër ndryshimeve, ndërsa 46% mbështetën propozimin e qeverisë. Reforma, e mbështetur nga Meloni, synonte ndarjen e qartë mes gjyqtarëve dhe prokurorëve, si dhe krijimin e strukturave të veçanta për administrimin dhe disiplinimin e tyre.
Në një reagim publik, Meloni tha se respekton vendimin e qytetarëve, duke e cilësuar rezultatin si një “mundësi të humbur për modernizimin e vendit”.
Referendumi, megjithëse teknik në përmbajtje, u kthye në një test politik për qeverinë e saj, pas më shumë se tre vitesh në pushtet. Pjesëmarrja në votim arriti afro 60%, një nivel i lartë që pritej të favorizonte qeverinë, por që në fund nuk mjaftoi për të kaluar reformën.
Qeveria argumentonte se ndryshimet do të forconin pavarësinë e drejtësisë, ndërsa opozita paralajmëronte se ato mund të rrisnin ndikimin politik mbi sistemin gjyqësor dhe të prishnin balancat e vendosura pas rënies së fashizmit.
Fitorja e kampit “Jo” po shihet si një sinjal se një pjesë e elektoratit italian kërkon ndryshim politik, në prag të zgjedhjeve të përgjithshme që pritet të mbahen vitin e ardhshëm.
