Kujdesi për kafshët shtëpiake po ndryshon ndjeshëm në vitet e fundit. Koncepti tradicional i “pet care”, që lidhej kryesisht me trajtimin veterinar kur kafsha sëmurej, po zëvendësohet nga një qasje më e gjerë e quajtur “pet wellness”, e fokusuar te parandalimi, mirëqenia emocionale dhe cilësia e jetës së kafshëve.
Pronarët e qenve dhe maceve po kërkojnë gjithnjë e më shumë zgjidhje natyrale dhe më pak invazive, të ngjashme me ato që përdorin edhe për veten e tyre.
Kjo tendencë është bërë aq e rëndësishme sa në Itali është krijuar një hapësirë e veçantë për të në Quattrozampeinfiera, eventi më i madh i dedikuar kafshëve shtëpiake. Edicioni i radhës do të zhvillohet më 14 dhe 15 mars në Fiera Roma, ku një nga risitë kryesore është “Area Benessere”, e fokusuar te shëndeti dhe mirëqenia e kafshëve.
Ekspertët prezantojnë disa nga praktikat që po përdoren gjithnjë e më shumë për qentë dhe macet.
Ayurveda për kafshët
Është përshtatja e mjekësisë tradicionale indiane për botën e kafshëve. Ajo bazohet në balancën energjetike të organizmit dhe përfshin ushqim të personalizuar, përdorimin e bimëve dhe vajrave natyralë për të përmirësuar shëndetin e përgjithshëm.
Shiatsu
Një teknikë manuale japoneze që përdor presione në pika të caktuara të trupit për të relaksuar muskujt dhe për të reduktuar stresin. Tek kafshët përdoret veçanërisht për qentë dhe macet e moshuara ose për ato që kanë ankth.
Naturopatia
Një qasje natyrale që mbështet sistemin imunitar përmes suplementeve ushqimore dhe preparateve bimore. Shpesh përdoret në periudha stresi për kafshën, si ndryshimi i shtëpisë, udhëtimet apo ardhja e një anëtari të ri në familje.
Osteopatia për kafshët
Një praktikë manuale jo invazive që fokusohet në artikulacionet, muskujt dhe posturën e trupit. Është veçanërisht e dobishme për qentë sportivë, kafshët e moshuara ose ato që kanë pësuar trauma.
Sipas organizatorëve të eventit, kjo qasje tregon një ndryshim kulturor në marrëdhënien mes njerëzve dhe kafshëve shtëpiake. Ato nuk konsiderohen më vetëm si shoqërues, por si pjesë e familjes, ndaj edhe kujdesi për shëndetin e tyre po bëhet gjithnjë e më i plotë dhe i personalizuar.
