Zbulohen emrat e zyrtarëve të Agjencisë Kombëtare të Mjedisit, dhe portit të Durrësit ndaj të cilëve Prokuroria e Durrësit firmosi masë sigurie ‘arrest me burg’ e ‘arrest shtëpie’ lidhur me kontrabandën e mbetjeve të rrezikshme drejt Tajlandës në korrik të 2024.
Konteinerët mbartnin mbi 2800 ton mbetje të rrezikshme me origjinë nga furnaltat e kompanisë “Kurum International” konfirmoi prokuroria një vit më pas, më 24 dhjetor 2025.
Gjatë hetimit, Prokuroria pretendon se ka zbuluar shkelje të ligjit dhe shpërdorim detyre nga drejtuesit e Agjencisë Kombëtare të Mjedisit, (AKM), nga punonjës të Doganave, të Autoritetit Portual Durrës si dhe nga kompania koncesionare që menaxhon terminalin lindor, EMS Albanian Port Operator.
Prandaj janë firmosur masa sigurie për zyrtarët e AKM-së, drejtorisë së Doganave në Durrës si dhe punonjësit e disa kompanive të tjera të akuzuara për shkelje të legjislacionit mbi trajtimin e mbetjeve.
Konkretisht Ish-drejtoresha e Agjencisë Kombëtare të Mjedisit, Arta Dollani, drejtoresha aktuale Marjeta Përlala dhe shtatë zyrtarë të tjerë të kësaj agjencie akuzohen për veprën penale të shpërdorimit të detyrës në lidhje me dështimin e mbikëqyrjes dhe monitorimit të lejeve mjedisore ndaj kompanisë „Kurum” dhe kompanive të tjera të përfshira.
Ndaj Dollanit dhe Përlalës u vendosën masat e arrestit shtëpiak.
Nën akuzë janë edhe drejtuesit e kompanisë koncesionare të terminalit lindor të portit të Durrësit, EMS Albanian Port Operator, pesë nëpunës të Doganës së Durrësit, dy inspektorë të Autoritetit Portual si dhe drejtues të disa kompanive të tjera.
“AKM e Dollanit nuk kreu inspektime”
Prokuroria akuzon ish-drejtoreshën e AKM, Arta Dollani, drejtoreshën aktuale, Marjeta Përlala si dhe pesë zyrtarë të tjerë të këtij institucioni për shkelje në ushtrimin e detyrës si institucion mbikëqyrës dhe përgjegjës për respektimin e kritereve të sigurisë në fushën e mjedisit.
Sipas hetimit, AKM nuk ka kryer inspektime në përputhje me ligjin pranë shoqërive Kurum International, Alliance Resorce, Sokolaj dhe ESM APO, duke i hapur rrugën grumbullimit, transportimit dhe kontrabandimit të mbetjeve të rrezikshme të kodit 10 02 07*.
“Rezulton se AKM nuk ka kryer inspektime periodike tematike, por vetëm inspektime vjetore të përgjithshme, në të cilat gjithashtu evidentohen shkelje mbi rezultatet e inspektimit,” thuhet në kërkesën për masën e sigurisë.
Sipas Prokurorisë, AKM është gjithashtu përgjegjëse se nuk ka monitoruar cilësinë e vetëmonitorimeve të kompanive private, të cilat i kanë kryer ato fiktivisht dhe në shkelje të detyrimeve të diktuara nga ligji, shkruan BIRN.
“Dogana e Durrës lejoi eksportimin e mbetjeve të rrezikshme”
Një tjetër hallkë problematike në zinxhir është Drejtoria Doganore e Durrësit, e cila sipas Prokurorisë i ka trajtuar praktikat në kundërshtim me ligjin, duke lejuar eksportimin e mbetjeve të rrezikshme.
Sipas hetimit, mbetjet e rrezikshme janë depozituar nga kompania “Kurum” në terminalin lindor të portit të Durrësit, i operuar nga kompania koncesionare EMS Albania Port Operator, edhe pse kjo e fundit nuk ishte pajisur me leje mjedisore për pranimin e tyre.
Kompania EMS APO i ka dhënë kompanisë Sokolaj hapësirë për depozitimin e mbetjeve në portin e Durrësit, përmes disa kontratave të qirasë të lidhura me kompaninë GS Minerals d.o.o.
Kompania koncesionare kishte gjithashtu detyrimin që të raportonte periodikisht mbi llojin e mbetjeve që depozitonte, por nuk e ka përmbushur atë.
“Në rastin objekt hetimi, EMS APO ka pranuar në të paktën 4 raste të grumbullojë mbetje të rrezikshme, pa kryer asnjë lloj verifikimi dhe pa pasur asnjë mekanizëm sigurie për të shmangur efektet e dëmshme në mjedis dhe në shëndet,” thuhet në vendimin e gjykatës.
Zyrtaret me masë nga Dogana e Durrësit
Julian Kapedani Dega e Doganës Durrës në arrest me burg
Indrit Likaj Dega e Doganës Durrës në arrest me burg
Helidon Lila Dega e Doganës Durrës në arrest me burg
Edmond Voda Dega e Doganës Durrës në arrest me burg
Shkëlqim Jakupi Dega e Doganës Durrës në arrest me burg
Zyrtaret me masë nga kompania koncesionare të terminalit
Florian Çimo Administrator i kompanisë koncesionare EMS APO në arrest me burg
Gazmend Sina Punonjës i kompanisë koncesionare EMS APO në arrest me burg
Ingo Hesse, administrator i kompanisë EMS APO në arrest me burg
Zyrtaret me masë nga Agjencia Kombëtare të Mjedisit
Arta Dollani Ish- drejtoresha e Përgjithshme e AKM në arrest shtëpiak
Marjeta Përlala Drejtoresha aktuale e AKM në arrest shtëpiak
Dritan Seferaj Drejtoria e Inspektim- Kontrollit, AKM në arrest me burg
Kledina Skendo Sektori i monitorimit të lejeve mjedisore, AKM në arrest shtëpiak
Evis Mellonashi Sektori i lejeve mjedisore, AKM në arrest shtëpiak
Kejdi Ahmetaj Drejtoria e Inspektimit, AKM në arrest me burg
Iva Musa Inspektore e Autoritetit Portual Durrës, arrest shtëpiak
Xhulio Golgota Inspektor i Autoritetit Portual Durrës, arrest me burg
Administratore kompanish
Gjovana Sokolaj Pronare e kompanisë “Sokolaj” në arrest me burg
Doni Sokolaj Administrator i kompanisë D.o.o Minerals në arrest me burg
Olizana Pemati Ish- administratore e kompanisë “Sokolaj” në arrest me burg
Mikail Hila Aksioner i agjencisë doganore “Joti Spedition” në arrest me burg
Mbarime Koroci Aksionere e kompanisë “Alliance Resource” në arrest me burg
Nazif Bajrami Pronar i kompanisë “Bajrami N” në arrest me burg
Andon Prifti Administrator i kompanisë “Bajrami N” në arrest me burg
Petrit Qosja Person fizik në tregtinë e mbetjeve në arrest me burg
Emrat e plotë në dokumentin bashkangjitur./Syri
