Minneapolis, SHBA – Senatorë republikanë i janë bashkuar thirrjeve për një hetim të plotë dhe të pavarur lidhur me vrasjen e Alex Pretti, 37 vjeç, qytetar amerikan, i cili u qëllua për vdekje nga agjentë federalë të imigracionit gjatë një operacioni ndalimi në Minneapolis.
Ngjarja ka rritur presionin mbi administratën e presidentit Donald Trump, pasi kjo është vrasja e dytë nga agjentët federalë në Minneapolis brenda dy javësh. Më herët, një tjetër person, Renee Good, u vra gjatë një ndërhyrjeje të ngjashme.
Guvernatori i Minesotës, Tim Walz, ka deklaruar se “mjaft është mjaft”, duke paralajmëruar se Shtetet e Bashkuara ndodhen në një pikë kthese, ndërsa ka kërkuar largimin e agjentëve federalë nga shteti.
Në një intervistë për Wall Street Journal, presidenti Trump deklaroi se administrata e tij po “rishikon gjithçka”, duke lënë të hapur mundësinë e tërheqjes së agjentëve të ICE nga Minneapolis, por pa dhënë një afat kohor konkret.
Versione të kundërta për momentet para vrasjes
Rrethanat e vrasjes së Alex Pretti-t mbeten të paqarta, pasi autoritetet federale dhe ato lokale japin versione të ndryshme për atë që ndodhi para të shtënave.
Administrata Trump pretendon se Pretti mbante një armë zjarri dhe përbënte rrezik për agjentët, ndërsa nuk ka pamje video që ta tregojnë atë duke e mbajtur armën në dorë.
Autoritetet lokale kanë deklaruar se arma ishte e regjistruar ligjërisht dhe se Pretti u qëllua pasi arma ishte hequr, duke hedhur poshtë pretendimet se ai përbënte një kërcënim të menjëhershëm.
Pas ngjarjes, protesta janë zhvilluar në Minneapolis dhe në qytete të tjera amerikane, ndërsa familjarë dhe qytetarë kanë ngritur memoriale për viktimën në vendin e ngjarjes. Presioni publik dhe politik për transparencë dhe përgjegjësi ndaj agjentëve federalë vijon të rritet.
