Kryetari i Partisë Demokratike, Sali Berisha, ka ashpërsuar tonet në seancën plenare të Kuvendit, duke akuzuar mazhorancën se po devijon qëllimin real të diskutimit parlamentar dhe po e shndërron një çështje me rëndësi ndërkombëtare në një akt personal dhe politik.
Gjatë fjalës së tij, Berisha u shpreh se seanca duhej të shërbente për të dëshmuar qëndrimin e Shqipërisë në mbështetje të politikave të sigurisë së Shteteve të Bashkuara dhe për vlerësimin e rolit amerikan në ndërprerjen e luftimeve në Gaza. Sipas tij, kjo temë po banalizohet nga mazhoranca dhe nga kryeministri Edi Rama.
“Kjo seancë sot, në vend se të dëshmojë qëndrimin tonë lojal në çështjet e sigurisë ndaj SHBA dhe vlerësimin maksimal për njërën nga paqet më të vështira në histori, po shndërrohet në një shfaqje me figura butaforike,” deklaroi Berisha.
Ai përdori një gjuhë të ashpër ndaj zv/kryeministres Belinda Balluku, duke thënë se prania dhe roli i saj po i jepnin “nuanca” seancës parlamentare.
“Palloshi i Belindës i jep kësaj seance nuanca… Pyetja ime është: çfarë do të thoni kur Belinda ta marrë me vete?” – u shpreh kreu i PD-së, duke nënkuptuar pasoja politike dhe ligjore për mazhorancën.
Berisha akuzoi gjithashtu kryeministrin Rama se po personalizon një akt të rëndësishëm ndërkombëtar për interesa të ngushta politike, duke paralajmëruar se, sipas tij, drejtësia do të sjellë pasoja për figurat kryesore të qeverisë.
Deklaratat e Berishës shkaktuan reagime dhe tensione në sallën e Kuvendit, duke e kthyer seancën në një debat të ashpër politik, larg fokusit të çështjeve të sigurisë dhe zhvillimeve ndërkombëtare që ishin në rendin e ditës.
