Beverly Hills, Kaliforni – Filmat “One Battle After Another” dhe “Hamnet” ishin fituesit kryesorë të mbrëmjes në ceremoninë e Golden Globes 2026, një nga eventet më të rëndësishme që hap sezonin e çmimeve në Hollywood.
Komedia e errët “One Battle After Another” u shpall filmi më i mirë muzikor ose komedi, duke rrëmbyer gjithsej katër çmime, ndërsa “Hamnet”, një dramë që trajton dhimbjen e William Shakespeare pas humbjes së djalit të tij, fitoi çmimin për filmin më të mirë dramatik.
Në një nga kategoritë më të forta të mbrëmjes, Timothée Chalamet fitoi çmimin për aktorin më të mirë në film muzikor ose komedi, për rolin e tij si një lojtar profesionist pingpongu në filmin “Marty Supreme”. Ai la pas emra të mëdhenj si Leonardo DiCaprio dhe George Clooney.
“Kjo kategori ishte e jashtëzakonshme. I admiroj të gjithë,” u shpreh Chalamet, duke theksuar se fitoret e mëparshme të mungura e bënin këtë moment edhe më të veçantë.
Filmi “One Battle After Another”, prodhim i Warner Bros Discovery, konsiderohet si një nga favoritët kryesorë edhe për Oscar 2026. Regjisori Paul Thomas Anderson u vlerësua me çmimet për regjinë më të mirë dhe skenarin më të mirë, ndërsa Teyana Taylor fitoi çmimin për aktoren më të mirë dytësore.
Nga ana tjetër, “Hamnet” solli sukses për aktoren irlandeze Jessie Buckley, e cila u shpall aktorja më e mirë në film dramatik për rolin e Agnes Hathaway, bashkëshortes së Shakespeare-it.
Në kategori të tjera, filmi brazilian “The Secret Agent” u shpall filmi më i mirë në gjuhë jo-angleze, ndërsa Wagner Moura fitoi çmimin për aktorin më të mirë dramatik. Stellan Skarsgård u vlerësua për rolin dytësor në dramën norvegjeze “Sentimental Value”.
Në televizion, seriali “The Pitt” fitoi si drama më e mirë, ndërsa “The Studio” u shpall komedia më e mirë. Një çmim i ri për podcast shkoi për “Good Hang with Amy Poehler”.
Ceremonia u moderua nga Nikki Glaser, e cila nuk kurseu batutat ndaj yjeve të Hollywood-it, duke e cilësuar eventin si “pa dyshim gjëja më e rëndësishme që po ndodh në botë tani”.
