Postimet e fundit në rrjetet sociale të Brigitte Bardot u dhanë fansave një pasqyrë prekëse të asaj që ajo bëri deri në ditët e fundit të jetës: kujdesin dhe dashurinë për kafshët. Ikona franceze, e cila ndërroi jetë në moshën 91-vjeçare pas një qëndrimi në spital në Toulon, u shfaq në postimin e fundit duke kaluar kohë me qen të shpëtuar, aktive dhe e përfshirë në misionin që e kishte zgjedhur që prej dekadash.
Në një nga postimet më të fundit në Instagramin e The Brigitte Bardot Foundation, Bardot shihet pranë një qeni doberman të quajtur Urphe, i cili po kërkonte një familje të re pasi pronari i tij ishte detyruar të zhvendosej në një azil. Në video, Bardot shfaqet së bashku me vullnetarët e fondacionit, duke i kushtuar kohë dhe përkujdesje kafshës, një skenë që përmbledh thelbin e jetës së saj pas largimit nga kinemaja.
Një tjetër post i fundit, me rastin e Krishtlindjeve, e tregonte Bardot duke përqafuar dhe puthur një tjetër qen të shpëtuar, ndërsa ekipi i fondacionit uronte ndjekësit dhe i ftonte të kujdeseshin për kafshët shtëpiake dhe ato në nevojë. Mesazhi shoqërues theksonte solidaritetin, humanizmin dhe mbrojtjen e jetës së kafshëve – vlera që Bardot i kishte kthyer në mision personal.
Fondacioni që ajo themeloi në vitin 1986 ka qenë i angazhuar ndër vite në ndihmën e strehimoreve, shpëtimin e kafshëve të braktisura dhe fushatat e sterilizimit, duke ndikuar në miliona jetë. Vetë Bardot ishte shprehur dikur: “I dhashë rininë dhe bukurinë time njerëzve, tani u jap kafshëve përvojën dhe më të mirën e vetes sime.”
Edhe pse në vitet e fundit jetonte e tërhequr në Saint-Tropez, Bardot mbeti simbol global i aktivizmit për kafshët. Postimet e saj të fundit nuk ishin thjesht kujtime personale, por një mesazh i fortë për vazhdimësinë e kauzës, duke treguar se përkushtimi ndaj kafshëve ishte pjesë e identitetit të saj deri në frymën e fundit.
