Venezuela ka reaguar ashpër ndaj deklaratës së Presidentit amerikan, Donald Trump, që deklaroi se hapësira ajrore mbi vendin duhet të konsiderohet e mbyllur.
Ministria e Jashtme e Venezuelës e quajti këtë një “agresion ekstravagant, të paligjshëm dhe plotësisht ba baza ndaj popullit venezuelian”.
Sipas deklaratës, SHBA-të nuk kanë autoritet ligjor për të mbyllur hapësirën ajrore të një vendi tjetër dhe komentet e Trump u cilësuan një “kërcënim si në kohët e kolonizimit“.
SHBA-të kanë rritur praninë ushtarake në rajon dhe kanë kryer të paktën 21 sulme ndaj anijeve duke vrarë mbi 80 persona. Pretendimet ishin se në to po transportohej drogë, por ende nuk është dhënë asnjë provë.
Presidenti i Venezuelës, Nicolás Maduro, thotë se veprimet e SHBA-ve janë për të hequr atë nga pushteti.
Ndërkohë, Trump ka shkruar në rrjetin social TruthSocial se “të gjitha linjat ajrore, pilotët, trafikantët e drogës dhe ata të qenieve njerëzore, ta konsiderojnë hapësirën ajrore mbi dhe rreth Venezuelës totalisht të mbyllur”.
Disa ligjvënës amerikanë, si demokratë ashtu dhe republikanë, shprehën shqetësim se Trump nuk ka kërkuar miratimin e Kongresit për veprime të tilla. Senatori demokrat Chuck Schumer tha se këto veprime e afrojnë Amerikën më shumë drejt një lufte me kosto të lartë, duke kujtuar se vetëm Kongresi ka të drejtën të shpallë luftë.
Komentet e Trump erdhën pak ditë pasi Administrata Federale e Aviacionit (FAA) paralajmëroi linjat ajrore për “aktivitet ushtarak të shtuar mbi dhe rreth Venezuelës”, duke bërë që disa kompani të ndërpresin fluturimet.
Ministria e Jashtme e Venezuelës i bëri thirrje komunitetit ndërkombëtar, qeverive të shteteve të tjera, OKB-së dhe organizatave të refuzojnë këtë akt agresioni. Në të njëjtën ditë, ushtria e Venezuelës zhvilloi manovra në zonat bregdetare, duke përdorur armë kundërajrore dhe artileri të tjera.
Ndërkohë, SHBA-të kanë dërguar aeroplanmbajtësen më të madhe në botë, USS Gerald Ford, dhe rreth 15 mijë trupa pranë Venezuelës, duke e arsyetuar se qëllimi është lufta ndaj trafikimit të drogës. Trump paralajmëroi se operacionet lidhur me këtë do të fillojnë shumë shpejt.
Qeveria venezueliane beson se qëllimi i SHBA-ve është të rrëzojë Maduron, i cili u rizgjodh vitin e kaluar në një proces që opozita dhe disa vende e konsideruan të manipuluar.
Presidenti i majtë i Kolumbisë, Gustavo Petro, tha se SHBA-të po përdorin “dhunë për të dominuar” Amerikën Latine, megjithëse disa udhëheqës të tjerë në rajon e kanë mbështetur qëndrimin e Trump.
SHBA-të gjithashtu kanë shpallur grupin “Cartel de los Soles”, që sipas tyre drejtohet nga Maduro, si organizatë terroriste e huaj, duke i dhënë agjencive amerikane më shumë fuqi për ta goditur dhe shkatërruar./klan
