Rahmanullah Lakanwal, 29 vjeç, shtetasi afgan i akuzuar për plagosjen e rëndë të dy pjesëtarëve të Gardës Kombëtare vetëm pak blloqe larg Shtëpisë së Bardhë, ka punuar më herët krah për krah me CIA-n dhe forcat amerikane në Afganistan, kanë konfirmuar zyrtarët federalë.
Sipas FBI-së dhe Prokurorisë së Distriktit të Kolumbias, Lakanwal mbërriti në SHBA në vitin 2021 përmes programit Operation Allies Welcome, i krijuar pas tërheqjes së trupave amerikane nga Afganistani, i cili u ofroi mbrojtje të veçantë rreth 77.000 afganëve që kishin bashkëpunuar me forcat amerikane.
“Të lutemi të dy mbijetojnë, në mënyrë që akuza të mos shkojë drejt vrasjes së shkallës së parë”, tha Prokurorja Amerikane Jeanine Pirro, teksa konfirmoi se viktimat – Sarah Beckstrom, 20 vjeç, dhe Andrew Wolfe, 24 vjeç – mbeten në gjendje kritike.
Nga Kandahari në Kabul, pastaj në SHBA
Sipas ish-komandantit të tij ushtarak që foli për BBC-në, Lakanwal kishte shërbyer në Unit 03 të Kandahar Strike Force, të njohur edhe si “Scorpion Forces” – një njësi që fillimisht operonte nën CIA-n e më pas nën shërbimin afgan të inteligjencës (NDS).
- Mbronte trupat amerikane në aeroportin e Kabulit gjatë kaosit të evakuimit në 2021.
- Ishte specialist i pajisjeve GPS.
- Përshkruhet si “sportiv dhe gazmor”.
- U evakuua në SHBA së bashku me të gjithë njësinë e tij.
Në vitin 2024, ai aplikoi për azil politik në SHBA dhe e fitoi atë këtë vit, raportoi CBS.
Vetitë e sulmit: ‘Ambush’ dhe i qëllimshëm
Zyrtarët federalë thanë se sulmi ishte i synuar dhe se Lakanwal udhëtoi me makinë nga shteti i Uashingtonit deri në kryeqytet për ta kryer.
Ai akuzohet për:
- Tre akuza për sulm me qëllim vrasje,
- Një akuzë për armë zjarri gjatë një akti të dhunshëm.
Në vendngjarje, pjesëtarë të tjerë të Gardës Kombëtare e qëlluan dhe e neutralizuan. Lakanwal ndodhet në spital nën kujdes policor.
Reagimi politik: Trump e quan ‘akt terrori’
Presidenti Donald Trump e cilësoi ngjarjen si “akt terrori”, duke premtuar masa të ashpra:
- Pezullim të menjëhershëm të të gjitha kërkesave të imigracionit nga Afganistani.
- Rishqyrtim të çdo personi që ka hyrë në SHBA në kuadër të programit të vitit 2021.
- Dërgimin e 500 trupave shtesë të Gardës Kombëtare në rrugët e Washington-it.
Aktualisht, mbi 2.000 trupa janë të dislokuar në kryeqytet që prej gushtit, si pjesë e operacionit federal për të luftuar kriminalitetin në qytetet e drejtuara nga demokratët.
Dy viktimat, Beckstrom dhe Wolfe, mbeten në gjendje kritike pas plagëve të shumta me armë zjarri.
