Administrata e Donald Trump prezantoi të hënën disa përfundime shumë të kontestuara mbi shkaqet e autizmit, si dhe një nismë të re për kërkime që pretendojnë të gjejnë një “kurë” të mundshme për këtë gjendje.
Presidenti Trump, i shoqëruar nga sekretari i shëndetësisë Robert F. Kennedy Jr., deklaroi nga Shtëpia e Bardhë se gratë shtatzëna duhet të kufizojnë përdorimin e acetaminofenit (i njohur si Tylenol në SHBA), duke pretenduar se ai rrit rrezikun për autizëm. Kjo tezë është kundërshtuar ashpër nga shkencëtarë ndërkombëtarë dhe bie ndesh me studime të shumta.
“Përdorimi i Tylenol nuk është i mirë… të gjitha gratë shtatzëna duhet të flasin me mjekët e tyre për ta kufizuar këtë medikament,” tha Trump, duke e cilësuar njoftimin si një nga më të mëdhenjtë në historinë mjekësore të vendit.
Kennedy shtoi se Departamenti i Shëndetësisë dhe FDA do të punojnë për të ndryshuar etiketimin e rreziqeve të acetaminofenit. Ai gjithashtu foli për rekomandime të reja që vaksina e hepatitit B për të porsalindurit të jepet me vonesë ose në doza më të vogla – megjithëse për këtë mungon evidencë shkencore e mjaftueshme.
Sipas të dhënave të CDC, në vitin 2022 një në 31 fëmijë 8-vjeçarë në SHBA ishin diagnostikuar me çrregullim të spektrit të autizmit (ASD), krahasuar me një në 150 në vitin 2000.
Megjithatë, ekspertët theksojnë se rritja lidhet kryesisht me përmirësimin e diagnostikimit dhe përkufizimeve, ndërsa shkaqet janë kryesisht gjenetike. Studiues nga SHBA dhe Britania e Madhe e quajtën lidhjen me Tylenol “frikësim të panevojshëm” që rrezikon të stigmatizojë prindërit. Një studim i madh suedez mbi 2.4 milionë lindje, i botuar në vitin 2024, nuk gjeti asnjë lidhje mes përdorimit të acetaminofenit gjatë shtatzënisë dhe autizmit, ADHD ose paaftësive intelektuale.
Kritikë të shumtë akuzuan administratën për mungesë transparence dhe përhapje të pritshmërive jorealiste mbi një “kurë” të mundshme, duke paralajmëruar se kjo mund të dëmtojë besimin publik në shkencë dhe shëndetin publik.
