Në Kalanë e Windsor-it u mbajt një banket shtetëror luksoz në nder të vizitës së presidentit amerikan Donald Trump dhe Zonjës së Parë Melania Trump, duke përmbyllur ditën e parë të vizitës zyrtare në Mbretërinë e Bashkuar.
Mikpritësit e mbrëmjes ishin Mbreti Charles III dhe Mbretëresha Camilla, të shoqëruar nga Princi dhe Princesha e Uellsit, ndërsa mes të ftuarve ishin personalitete të njohura botërore si kryeministri britanik Keir Starmer, CEO i Apple Tim Cook, CEO i OpenAI Sam Altman, CEO i Nvidia Jensen Huang, si dhe Rupert Murdoch, mediamogul i njohur.
View this post on Instagram
Një darkë madhështore me simbole britanike dhe amerikane
Banketi u zhvillua në një tryezë të gjatë 47.3 metra, e rrethuar nga 160 të ftuar dhe e dekoruar me 139 qirinj, 1452 copë argjendari dhe 100 anëtarë stafi në shërbim.
Menuja përfshinte tre pjata kryesore:
- Pjatë hyrëse: panna cotta me rukola Hampshire, biskota me parmixhan dhe sallatë me vezë thëllëze.
- Pjata kryesore: pulë organike Norfolk e mbështjellë me kungulleshka dhe shoqëruar me salcë aromatike me trumzë.
- Ëmbëlsira: akullore vanilje me zemër sorbetoje nga mjedra, e shoqëruar me kumbulla Victoria të ziera lehtë.
Pijet e mbrëmjes përfshinin një Vintage Port 1945 – një homazh për Trump-in si presidenti i 45-të i SHBA – si dhe një Hennessy Cognac 1912, vitlindja e nënës së tij. Një koktej special i quajtur “Transatlantic Whisky Sour” u krijua posaçërisht për këtë rast.
Atmosfera dhe programi artistik
Gjatë darkës, mysafirët u argëtuan me një program muzikor që përfshinte “Nessun Dorma” nga opera e Puçinit dhe “Ave Maria” e Schubert, si dhe një repertor me muzikë tradicionale skoceze të luajtur nga pipers (muzikantë me fyej tipikë).
Dekorimi i sallës u bë me lule dhe barishte të freskëta, të mbledhura nga kopshtet e Buckingham Palace dhe Windsor Castle. Pas mbrëmjes, lulet që nuk mund të ripërdoren do t’i dhurohen një organizate bamirësie për t’u shpërndarë në shtëpi kujdesi dhe strehimore.
Një ngjarje me rëndësi diplomatike
Në tryezë, Mbreti Charles ishte ulur pranë Presidentit Trump, ndërsa përballë tyre qëndronin Mbretëresha Camilla dhe Melania Trump. Në një krah tjetër ishin Princi William dhe Princesha Catherine, si dhe zyrtarë të lartë nga të dy vendet, përfshirë sekretarin e thesarit amerikan Scott Bessent dhe senatorin Marco Rubio.
Ky banket vlerësohet si një moment kyç për marrëdhëniet mes SHBA dhe Britanisë së Madhe, duke përforcuar lidhjet diplomatike dhe tregtare midis dy vendeve.
