Rumunët iu drejtuan sërish këtë të diel kutive të votimin për raundin e dytë të zgjedhjeve presidenciale, të konsideruara si më të rëndësishmet e 35 viteve të fundit që pas rënies së komunizmit.
Ky balotazh përcakton nëse vendi do të marrë një kthesë drejt Moskës, apo do të vazhdojë rrugëtimin euroatlantik.
Sondazhet nuk e përcaktojnë dot qartë fituesin mes pro-rusit George Simion dhe kryebashkiakut të Bukureshtit, pro-europianit Nikushor Dan.
Në raundin e parë të 4 Majit, Simion triumfoi me 20 pikë diferencë ndaj Danit. Ndërsa sondazhet e kësaj jave treguan se ata janë kokë më kokë, madje në disa raste njëshi i kryeqytetit dilte në krye me një diferencë shumë të ngushtë.
Fitorja e krahut pro-Moskës mund t’i jepte goditje aleancës së vendeve europiane që mbështesin Kievin.
Aktualisht, Rumania është një nyje e rëndësishme për ndihmën që NATO i jep Ukrainës, me të cilën ndan një vijë të gjatë kufitare tokësore, e nga ku në këto tre vite janë nisur një pjesë e mirë e ndihmave ushtarake të aleancës për Kievin.
Simion ka premtuar se do të ndalë ndihmën ushtarake për Ukrainën dhe do të rishikojë marrëdhëniet me Rusinë.
Tv Klan
