Uashington, SHBA –Presidenti amerikan Donald Trump ka njoftuar se tarifat për makinat dhe kamionët e lehtë të ndërtuar jashtë vendit do të hyjnë në fuqi më 2 prill, ndërsa mbledhja e tarifave do të nisë menjëherë të nesërmen, më 3 prill.
“Ne po nënshkruajmë sot. Hyn në fuqi më 2 prill. Fillojmë ta mbledhim më 3 prill,” deklaroi Trump në një konferencë për shtyp, duke theksuar se masa synon të mbrojë prodhuesit amerikanë të makinave dhe të rrisë punësimin në sektorin industrial të vendit.
Ky vendim është pjesë e politikave proteksioniste që administrata Trump ka ndjekur që nga fillimi i mandatit, duke vendosur tarifa ndaj disa vendeve për të nxitur prodhimin vendas dhe për të reduktuar deficitin tregtar. Megjithatë, vendimi pritet të ngjallë reagime të forta nga vendet eksportuese të automjeteve, veçanërisht Bashkimi Evropian, Japonia dhe Koreja e Jugut, të cilat mund të përgjigjen me kundërmasa tregtare.
View this post on Instagram
Ekspertët e ekonomisë paralajmërojnë se tarifat mund të çojnë në rritjen e çmimeve të makinave për konsumatorët amerikanë dhe të ndikojnë negativisht në zinxhirët globalë të furnizimit. Shoqatat e industrisë së automobilave, përfshirë prodhues të mëdhenj si Toyota, BMW dhe Volkswagen, kanë shprehur shqetësime për ndikimin e këtyre tarifave në tregun amerikan.
Ndërkohë, pritet që qeveritë e vendeve të prekura të zhvillojnë negociata me administratën amerikane për të gjetur një zgjidhje dhe për të shmangur një luftë tregtare që mund të dëmtojë të dyja palët.
