Gjatë adresimit të saj në mbledhjen e Këshillit të Sigurimit të OKB-së për Kosovën kryediplomatja kosovare Donika Gërvalla ka thënë se sulmi terrorist i 24 shtatorit në Banjskë, ku u vra rreshteri Afrim Bunjaku, ishte test për perëndimin, test për ato që pritet të vijnë.
“Sulmi i Serbisë më 24 shtator të vitit të kaluar është planifikuar si invazion ushtarak dhe aneksim i një vendi paqësor me mijëra trupa të NATO-s. Për ta bërë të qartë këtë, ky ishte sulmi i parë i aleancës së Putinit ndaj një vendi me prezencë të NATO-s, është test për perëndimin, test për ato që pritet të vijnë”, tha gjatë fjalës së saj shefja e diplomacisë kosovare.
Tutje tha ajo se Vuçiqi e Putini nuk janë dorëzuar.
“Prandaj na duhet zmbrapsja e tyre pikë së pari e pastaj dialogu. Vetëm me zmbrapsje të tillë mund të kemi paqe e siguri, sepse kur Vuçiqi e Gjuriqi e të tjerë në Serbi thonë dialog, nuk e kanë këtë në mendje. Nuk kanë ndonjë interesim në dialog, thjesht kanë interes të shkatërrojnë Republikën e pavarur të Kosovës dhe atë me forcë. Askush nuk mund të mashtrohet, kjo është dëshmuar tashmë dhe do ta provojnë prapë. Kështu, Kosova është falënderuese për NATO-n për ngritjen e numrit të trupave për ta zmbrapsur Serbinë nga agresioni i radhës. Ministri i mbrojtjes i Serbisë që përgatiti sulmin paramilitar për më shumë se një vit, mori ngritje në detyrë nga Vuçiqi, tani ai është kryeministër i ri i Serbisë. Presidentja e KE-së refuzoi ta takonte për shkak të lidhjeve të tij aktive me Rusinë”, shtoi Gërvalla.
Ajo tha se duhet të flasin për rrezikun, e që disa sipas saj, kanë frikë ta përmendin, për luftën dhe si ta parandalojnë një luftë të ardhshme në Evropë.
“E nderuara presidente duhet të flasim për rrezikun që disa kanë frikë ta përmendin e duhet të flasim edhe për luftën, se si ta parandalojmë një luftë të ardhshme në Evropë, për të cilën disa thonë Putini mund ta ketë Ballkanin shënjestrën e ardhshme. Dora e zgjatur e Putinit, Vuçiqi vazhdon të mbrojë terroristët që udhëhoqën sulmin paramilitar të Serbisë kundër Republikës së Kosovës vitin e kaluar. Lideri i tyre, Radoiçiqi një prej njerëzve më brutal e më të pasur në Serbi, jo i pasur duke trashëguar nga prindërit e tij pasuri, por me anë të krimit, është angazhuar në zhvatje e vrasje të qytetarëve serb të Kosovës”, shtoi Gërvalla, derisa bëri të qartë kërkesën që ai të ekstradohet në Kosovë.
“Kosova kërkon ekstradimin e tij, ai është përgjegjës për vrasjen e zyrtarit tonë policor, heroit tonë kombëtar, toger, Afrim Bunjaku. Këtë Gjuriqi e di shumë mirë nga vitet e tij të shumta si dorë e djathtë e Vuçiqit në luftën kundër Kosovës gjatë viteve 2013-2020. Gjuriq dhe Radoiçiq vrasësi ishin aleat në shtypjen e qytetarëve serb të ndershëm që dëshironin vetëm jetë normale. Gjuriqi ishte kryesori kur Radoiçiqi u angazhua në vrasjen e politikanit më të shquar serb Oliver Ivanoviq që u vra para derës së tij. Dhe Gjuriqi takohej me të prapë, tash së voni duke pirë kafe në Beograd me të njëjtin kriminel e terrorist. E kjo tregon llojin e karaktereve me të cilët ballafaqohemi. Kush këtu është në rregull që të pihet kafe me një vrasës brutal”, tha Gërvalla derisa shpalosi edhe fotografinë e një takimi mes Gjuriqit e Radoiçiqit.
Gërvalla e ka quajtur secilën fjali të Gjuriqit në këtë seancë si gënjeshtër.
“Çfarë dëgjuam këtu sot janë aq shumë gënjeshtra sa që është e pamundur të demantojmë secilën prej tyre në këtë kohë kaq të shkurtër që jemi këtu. Shumica prej jush keni ambasada në Republikën e Kosovës që ju konfirmojnë që asnjë nga këto deklarata të Gjuriqit nuk janë të vërteta. Të jemi të qartë, të mos e besojmë asnjë gënjeshtër të tillë të çmendur që qytetarët e Kosovës nuk paskan qasje në shëndetësi, llogari bankare apo shërbime lokale. Realiteti është i qartë. Kemi shumë qytetar serb në komunat veriore të Republikës së Kosovës që na thonë me kënaqësi që përfundimisht kanë arritur të marrin frymë lirshëm pa frikë e që arrijnë të regjistrojnë fëmijët në komunë pas shumë vitesh”, tha ajo.
Gërvalla tha se në pjesën veriore të Kosovës është krijuar diçka e re, diçka e çmuar që sipas saj është normaliteti, lufta ndaj krimit, sundimi i ligjit në vend të sundimit të bandave kriminale të sponsorizuara nga Beogradi.
“Shërbime normale komunale në vend të keqpërdorimit të fondeve publike. Kemi krijuar atë që vendet tuaja demokratike me përvojë i ofrojnë për një kohë shumë të gjatë qytetarëve tuaj. Shërbim publik të përgjegjshëm e transparent. Do të vazhdojmë të mbrojmë qytetarët tanë e të zgjerojmë spektrin e shërbimeve që ata meritojnë të cilët nuk i kanë parë për aq shumë vite. Jo vetëm populli në Kosovë që është i ngopur me gënjeshtra të tilla, ka një arsye pse Vuçiqi po humb ndikimin mbi qytetarët serbët të Kosovës. Nëse ata nuk e besojnë propagandën e tij, askush nuk duhet ta besoj”.
Gërvalla: Putini e Vuçiqi përkëdheljen e shohin si shenjë dobësie të Perëndimit
Gërvalla tutje në fjalimin e saj ka thënë se përditë e më shumë ekspertë po paralajmërojnë që Serbia po i përngjanë Serbisë fashiste të viteve të ’90-ta.
“Serbia tashmë është kthyer në kërcënimin më të madh të paqes në Evropë menjëherë pas Rusisë. Edhe Putini edhe Vuçiqi e kanë një trashëgimi të errët, trashëgimi të agresionit e gjenocidit. Që të dy duhet të ndalen. Problemi për njerëzit e Vuçiqit nuk ka të bëjë me ndonjë Asociacion. Problem real është vetëm ekzistenca jonë. Për ta Asociacioni nuk është fare vegël për të lehtësuar jetën e qytetarëve, është thjesht një opsion tjetër në përpjekjet e tyre për ta copëtuar një pjesë të vendit tonë. Si Putini në Ukrainë, Vuçiqi nuk do asgjë më pak sesa zhdukjen e Republikës së Kosovës. Në vitin 1999 ai pati një rol integral në gjenocidin ndaj vendit tonë. Ky njeri nuk duhet të jetë president i një vendi. Duhet të jetë në gjykim ose burg”, tha Gërvalla.
Sipas kryediplomates kosovare trashëgimia e luftës së Vuçiqit dhe dhunës së tij është paralajmërim.
“Ideologjitë fashiste nuk janë folklor, janë shumë serioze në vetë kuptimin e fjalës. Në thelb të tij Vuçiqi nuk ka ndryshuar, është njeri i dhunës që nga mosha rinore, edhe i vrasjeve. Në ditët e gjenocidit të Srebrenicës ai kërcënoi Bashkësinë Ndërkombëtare dhe citoj: do të vrasi 100 myslimanë për secilin serb që vritet, një paralajmërim tjetër nga historia. Përkëdhelja vetëm sa e ushqen monstrumin e na sjellë më afër luftës. Vuçiqi thjesht pret për mundësinë e radhës. Po të mos ishin trupat e NATO-s në Kosovë, Vuçiqi e Putini do ta provonin invazionin e dytë brenda një viti”, tha Gërvalla.
Ajo akuzoi Vuçiqin për bllokim të dialogut të ndërmjetësuar nga BE-ja.
“Vuçiqi ka refuzuar nënshkrimin e propozimit të BE-së ne Bruksel, kur BE-ja kërkoi raundin e radhës ai prapë refuzoi nënshkrimin edhe këtë e dinim mirë. Kur BE-ja vazhdoi të insistonte që marrëveshja ishte e vlefshme pa nënshkrim, Vuçiqi i kërkoi kryeministres së tij t’i dërgojë letër BE-së që Serbia nuk pranon asnjërën nga këto marrëveshje. Por, BE-ja vazhdon të besojë që përkëdhelja e tillë dhe ujdi të tilla do ta zbusin këtë kafshë. Kjo vetëm e inkurajon Vuçiqin të eskalojë. Putini e Vuçiqi e konsiderojnë përkëdheljen e tillë si shenjë dobësie”, përfundoi Gërvalla.
Gërvalla: Vendosmëria e perëndimit do ta vendosë fatin e Ballkanit
Shefja e diplomacisë kosovare Donika Gërvalla në fund të fjalimit të saj tha se vendosmëria e perëndimit do ta vendosë fatin e Ballkanit.
Duke folur për dialogun me Serbinë ajo tha se oferta mbetet e hapur se janë të gatshëm të nënshkruajnë dokumentet që BE-ja i ka propozuar.
“Sa i përket dialogut mes Serbisë e Kosovës më lejoni ta përsërisë që oferta mbetet e hapur. Jemi të gatshëm të nënshkruajmë dokumente që BE-ja ka propozuar, thjesht po presim për nënshkrimin e Vuçiqit e në vend të kësaj ai vazhdon të përsërisë se nuk ka ndonjë obligim për Serbinë nga kjo marrëveshje. Vërtetë shpresoj që 2025 do të ketë rifillim të ri në këtë dialog me një objektiv të qartë e strategji të qartë që na mundësojnë hapa të vegjël kudo që të jetë e mundur ashtu që të mund ta tejkalojmë bllokimin apo ngecjen që shkaktohet nga Serbia. Sa i përket pjesëmarrjes së serbëve në institucione të Kosovës”.
Ajo tha se askush nuk i ka përjashtuar serbët nga institucionet.
“Serbia i ka kërkuar t’i braktisin institucionet e i ka kërcënuar ata që nuk kanë dashur të largohen”.
KS i OKB-së po diskuton për Kosovën
Këshilli i Sigurimit i Kombeve të Bashkuara po diskuton për Kosovën, përkatësisht për raportin gjashtëmujor të Sekretarit të Përgjithshëm të OKB-së Antonio Guterres për punën e misionit të OKB-së në Kosovë.
Shefja e misionit të UNMIK-ut, Caroline Zijadeh tha se që nga sulmi në Banjskë vazhdon të bëjë thirrje për llogaridhënie të kryerësve të këtij akti përmes një hetimi të thellë e proces gjyqësor të plotë. “Ato janë esenciale për stabilitetin. Një akt i tillë i dhunës është i papërsëritshëm dhe mund të përsëritet më. Në këtë drejtim seanca fillestare gjyqësore është mbajtur më 9 tetor kundër tre të pandehurve nga totali prej 45 të akuzuarve në aktakuzë“, ka theksuar Zijadeh gjatë raportimit në KS të OKB-së.
Ajo tutje ka thënë se në takimet me zyrtarët në Beograd dhe Prishtinë dhe me partnerët ndërkombëtar shihet një aspiratë për një dialog konstruktiv dhe marrëdhënie paqësore, por se sipas saj situata anë terren mbetet e brishtë dhe progresi mbetet vetëm tentativë.
“Gjatë vizitës sime të fundit në veri në shtator, organizatat e shoqërisë civile, palë politike dhe banorët aty kanë theksuar shqetësime serioze për sa i përket ndikimit të veprimeve të njëanshme që prekin të drejtat ekonomike dhe sociale. Mbyllja e degëve të Postës së Serbisë dhe zyrave komunale që udhëhiqen nga ana e Serbisë kanë kufizuar qasjen e tyre në shërbime kyçe, në veçanti sa i përket komunitetit serb në Kosovë“, ka shtuar ajo.
Ndërkohë, ministri i Jashtëm serb Marko Gjuriq ka vazhduar me propagandën e autoriteteve të Serbisë, duke thënë se situata në Kosovë është përkeqësuar në mënyrë dramatike, e cila, sipas tij, ka krijuar një klimë mosbesimi dhe frike.
Ai ka kërkuar veprim të shpejtë dhe të vendosur të OKB-së, teksa ka thënë se me kthimin e Kurtit në pushtet ka filluar margjinalizimi i popullatës serbe, duke përmendur 90 sulme ndaj serbëve në Kosovë, por pa ofruar fakte.
Ai ka fajësuar autoritetet e Kosovës se po refuzojnë të hedhin hapa para për formimin e Asociacionit./RTK
