Në një konferencë për mediat nga Kryesia e Kuvendit, këtë të mërkurë, 11 nëntor, Balla u pyet për kërkesën e Veliajt, ndërsa theksoi se marrëdhënia personale me kryebashkiakun nuk ndryshon qëndrimin e tij për përgjegjësinë individuale përpara institucioneve të drejtësisë.
“Veliajn e kam mik, por përballjen me drejtësinë duhet ta bëjë vetë”
Kreu i grupit parlamentar të PS-së deklaroi se çështjet gjyqësore të përfaqësuesve socialistë nuk mund të trajtohen si përgjegjësi e forumeve partiake.
“Unë mendoj që çështjet e çdo përfaqësuesi të zgjedhur të PS-së janë çështje individuale. Asnjë forum në PS nuk është mburojë e askujt në përballjen me drejtësinë. Veliajn e kam mik, por përballjen me drejtësinë duhet ta bëjë vetë”, deklaroi Balla.
I pyetur konkretisht nëse Veliaj do të mund të marrë pjesë në mbledhjen e Asamblesë, ai shmangu një përgjigje të drejtpërdrejtë.
Sipas Ballës, kjo është një çështje që duhet t’i drejtohet Sekretarit të Përgjithshëm të Partisë Socialiste.
Balla: PS është kundër paraburgimit kur akuzat nuk janë provuar
Pavarësisht qëndrimit për përgjegjësinë individuale, Balla theksoi se Partia Socialiste kundërshton përdorimin e masës së paraburgimit ndaj personave që ndodhen ende në fazën e hetimeve dhe për të cilët akuzat nuk janë provuar.
“PS ka qenë, është dhe ngelet kundër masës së paraburgimit, kur një person është vetëm në fazën e hetimeve e kur akuzat ndaj tij s’janë provuar”, u shpreh ai.
Deklarata vjen në një kohë kur Erion Veliaj ndodhet në paraburgim që prej shkurtit 2025, ndërsa çështja e tij ka shkaktuar diskutime edhe brenda Partisë Socialiste.
Asambleja e PS-së, kërkesa e Veliajt mbetet pa përgjigje
Asambleja e Partisë Socialiste është parashikuar të mblidhet të shtunën, më 14 nëntor, në Gjirin e Lalzit.
Veliaj ka kërkuar të marrë pjesë në këtë mbledhje, por nga deklarata e Ballës nuk rezulton nëse kërkesa është pranuar apo refuzuar.
Kreu i grupit parlamentar socialist e ndau qartë marrëdhënien personale me kryebashkiakun nga procesi i tij me drejtësinë, duke theksuar se asnjë forum partiak nuk mund të marrë përsipër mbrojtjen e një individi përballë institucioneve gjyqësore.
