Të paktën 18 persona kanë humbur jetën dhe mbi 100 të tjerë janë plagosur pas një vale të re sulmesh masive ruse me raketa dhe dronë në Ukrainë, një nga bombardimet më të mëdha të muajve të fundit.
Sipas autoriteteve ukrainase, 12 persona, mes tyre dy fëmijë, u vranë në qytetin e Dnipros, ndërsa gjashtë viktima u raportuan në kryeqytetin Kiev.
Presidenti Volodymyr Zelensky deklaroi se Rusia lëshoi gjatë natës 656 dronë sulmues dhe 73 raketa të llojeve të ndryshme, duke goditur infrastrukturë civile dhe objekte energjetike në disa rajone të vendit.
Në Dnipro, ekipet e shpëtimit nxorën nga rrënojat trupin e një djali 8-vjeçar dhe të një gruaje, pasi një pjesë e një pallati banimi u shkatërrua pothuajse plotësisht nga goditja.
Në Kiev, shpërthime të shumta u dëgjuan gjatë natës, ndërsa sulmet shkaktuan zjarre në zona të banuara, pranë një pike karburanti, në kantierë ndërtimi dhe në disa ndërtesa banimi. Në disa pjesë të kryeqytetit u raportuan edhe ndërprerje të energjisë elektrike.
Zelensky kërkoi ndihmë urgjente nga Shtetet e Bashkuara për furnizimin me raketa Patriot, duke theksuar se Ukraina ka nevojë për më shumë sisteme mbrojtëse përballë sulmeve ajrore ruse.
Nga ana tjetër, Ministria ruse e Mbrojtjes deklaroi se sulmet ishin përgjigje ndaj goditjeve të mëparshme ukrainase dhe pretendoi se të gjitha objektivat ushtarake të planifikuara ishin goditur me sukses.
Sulmet vijnë vetëm pak ditë pasi Moska paralajmëroi “goditje sistematike” kundër Ukrainës, duke akuzuar Kievin për një sulm vdekjeprurës në një konvikt studentor në territorin e pushtuar në lindje të vendit.
Lufta që nisi me pushtimin rus në shkurt të vitit 2022 vijon të shkaktojë viktima dhe shkatërrime të mëdha, ndërsa përpjekjet diplomatike për një armëpushim mbeten ende pa rezultat.
