Një marrëveshje e re në kampin opozitar po merr formë, ndërsa detaje të rëndësishme janë zbuluar nga drejtuesi i Forumit për Dialogun Politik, Ermal Hasimja në A2 CNN.
Sipas tij, Partia Demokratike, “Shqipëria Bëhet” dhe LZHK kanë arritur dakordësi në parim për pikat kryesore të reformës zgjedhore, duke synuar një qëndrim të unifikuar përballë mazhorancës.
Propozimi kryesor lidhet me ndryshimin e sistemit zgjedhor në proporcional kombëtar, ku e gjithë Shqipëria do të konsiderohej si një zonë e vetme zgjedhore.
Hasimja theksoi se ky sistem synon të eliminojë deformimet që, sipas tij, janë krijuar nga proporcionali rajonal dhe të rrisë përfaqësimin real politik.
Një tjetër pikë e rëndësishme e marrëveshjes është rritja e numrit të deputetëve në 140, në kundërshtim me propozimin e Partisë Socialiste për reduktimin e tyre në 100.
Po ashtu, palët janë dakord në parim për lista 100% të hapura dhe lejimin e koalicioneve parazgjedhore, si elemente që synojnë të rrisin konkurrencën dhe transparencën në zgjedhje.
Ky bashkëpunim shihet si një hap drejt bashkimit të opozitës, ndërsa negociatat vijojnë edhe me parti të tjera për të zgjeruar marrëveshjen.
