Në ditën e dhjetë të protestave studentore, Rama ka publikuar në rrjetet sociale një video ku shfaqen stolat e rinj të vendosur në bulevardin “Dëshmorët e Kombit”, përpara zyrës së tij.
“Mirëmëngjes”, shkruan kryeministri krahas pamjeve, pa shtuar komente të tjera.
Nga karriget e thyera te stolat prej guri
Për dy ditë me radhë, Rama kishte vendosur karrige përpara Kryeministrisë, duke ftuar studentët të uleshin për të diskutuar kërkesat e tyre.
Por protesta vijoi dhe ftesa u refuzua nga demonstruesit, të cilët këmbëngulin në dorëheqjen e kryeministrit.
Disa prej karrigeve u përmbysën dhe u dëmtuan, ndërsa mbrëmjen e së mërkurës njëra prej tyre u dogj në mes të bulevardit.
Tashmë, karriget janë zëvendësuar me stola guri, mbi të cilët është vendosur sërish fjala “Dialog”.
Molotovë dhe tensione mbrëmjen e së mërkurës
Ndryshimi vjen pas incidenteve të një nate më parë, kur protestues të maskuar hodhën bomba molotov drejt Kryeministrisë dhe Kullave Binjake, ndërsa drejt policisë u hodhën gurë.
Pas tensioneve, demonstruesit marshuan drejt Sheshit Skënderbej, përpara se reshjet e dendura të shiut të ndikonin në shpërndarjen e tubimit.
Me vendosjen e stolave të gurit, Rama përsërit për të tretën ditë radhazi ftesën për bisedime, ndërsa ende nuk ka një marrëveshje për nisjen e dialogut mes qeverisë dhe përfaqësuesve të protestuesve.
