Kylian Mbappé vazhdon të shkruajë historinë në Kupën e Botës. Sulmuesi i Francës është bërë futbollisti i parë që fiton dy herë “Këpucën e Artë” të Botërorit, pasi e mbylli edicionin e vitit 2026 si golashënuesi më i mirë i turneut.
27-vjeçari realizoi 10 gola në tetë ndeshje, duke lënë pas Lionel Messin, i cili e përfundoi kompeticionin me tetë gola.
Pas tetë golave në Katar 2022, Mbappé fitoi sërish trofeun individual, duke u bërë lojtari i parë në histori që siguron “Këpucën e Artë” në dy Botërorë radhazi.
Ylli francez është gjithashtu golashënuesi më i mirë i të gjitha kohërave në historinë e Kupës së Botës, me 22 gola, një më shumë se Messi. Rekordin e vendosi pas dy golave të shënuar në ndeshjen për vendin e tretë ndaj Anglisë, edhe pse Franca u mposht 6-4.
Në listën e golashënuesve më të mirë të Botërorit 2026, pas Mbappé dhe Messit renditen Jude Bellingham dhe Erling Haaland me nga shtatë gola, ndërsa Ousmane Dembélé dhe Harry Kane e mbyllën turneun me nga gjashtë realizime.
Ndërkohë, FIFA ndau edhe çmimin për portierin më të mirë të turneut. “Dorashka e Artë” shkoi për Unai Simón, i cili ishte një nga protagonistët e suksesit të Spanjës. Portieri 29-vjeçar pësoi vetëm një gol në tetë ndeshje dhe mbajti portën të paprekur në shtatë takime, duke qenë një nga shtyllat kryesore të skuadrës kampione të botës.
