Një zjarr masiv ka përfshirë një nga ndërtesat më të njohura të lidhura me diktatorin nazist Adolf Hitler, të ashtuquajturën “Foleja e Shqiponjës”, në Alpet bavareze të Gjermanisë. Flakët kanë përfshirë ndërtesën historike Kehlsteinhaus, ndërsa policia gjermane ka arrestuar një person të dyshuar për përfshirje në ngjarje.
Rreth 200 zjarrfikës dhe efektivë të emergjencave janë mobilizuar për të përballuar zjarrin, i cili shpërtheu mbrëmjen e së premtes, 23 tetor, në zonën malore të Berchtesgadenit, në jug të Gjermanisë.
Sipas autoriteteve gjermane, ndërtesa ishte përfshirë plotësisht nga flakët kur ekipet e emergjencës mbërritën në vendngjarje.
Operacioni i shuarjes është vështirësuar ndjeshëm nga pozicioni i izoluar i objektit, i cili ndodhet në një lartësi prej 1 834 metrash mbi nivelin e detit, në majën e Obersalzbergut.
Zjarrfikësve u është dashur të përdorin pajisje të rënda të frymëmarrjes dhe të përballen me kushte të vështira atmosferike për të arritur te ndërtesa.
Pamjet e publikuara nga agjencia AFP tregojnë flakë të mëdha që përfshijnë kompleksin historik, ndërsa tymi ngrihet mbi majat e Alpeve.
Policia gjermane ka konfirmuar ndalimin e një personi të dyshuar, ndërsa hetuesit po verifikojnë nëse zjarri është shkaktuar qëllimisht.
Mediat gjermane raportojnë se autoritetet dyshojnë për zjarrvënie, por motivi i mundshëm nuk është përcaktuar ende.
Fatmirësisht, nuk raportohet për persona të lënduar, ndërsa ndërtesa ka pësuar dëmtime të rënda.
“Foleja e Shqiponjës”, e njohur në gjermanisht si Kehlsteinhaus, u ndërtua gjatë viteve 1937-1938 dhe ishte pjesë e kompleksit malor të përdorur nga udhëheqësit e regjimit nazist.
Objekti, i vendosur në një pozicion spektakolar mbi Alpet bavareze, u përdor për pritje dhe takime të zyrtarëve të lartë nazistë, megjithëse vetë Hitleri e vizitonte rrallë.
Ndërtesa i mbijetoi Luftës së Dytë Botërore pa u shkatërruar dhe më pas u shndërrua në një atraksion turistik, me restorant dhe ekspozitë historike mbi periudhën naziste.
Sot ajo konsiderohet një vend që dëshmon historinë e errët të diktaturës naziste dhe krimeve të saj.
Zjarri i 24 tetorit ka ngritur shqetësime për të ardhmen e kësaj ndërtese historike, ndërsa hetimet e policisë gjermane vazhdojnë për të përcaktuar rrethanat e plota të ngjarjes.
Burimi: AFP
