Reagime të forta emocionale vijojnë pas vendimit të drejtësisë për vrasjen e Liridona Ademajt, ndërsa një mesazh prekës ka ardhur edhe nga Evi Kokalari.
Në një postim në rrjetet sociale, ajo shprehet se ndjen dhimbje të thellë për dy fëmijët e mitur të çiftit, të cilët, sipas saj, kanë mbetur pa të dy prindërit brenda një kohe shumë të shkurtër.
Kokalari tregon se nuk e ka njohur personalisht Liridonën, por kishte takuar më parë Naim Murselin, duke përshkruar një përshtypje që, sipas saj, nuk përputhet me ngjarjen e rëndë.
Ajo thekson se është e vështirë të pranosh se një person që mund të duket i qetë dhe paqësor, mund të ketë kapacitet për një krim të tillë.
Në reagimin e saj, Kokalari ndalet veçanërisht te fëmijët, për të cilët thotë se i kishte parë shpesh në rrjetet sociale dhe i përshkruan si “dy engjëj”.
Mesazhi mbyllet me një urim që viktima të gjejë paqe, ndërsa nënvizohet se ngjarje të tilla lënë pasoja të rënda dhe dhimbje të thellë në opinionin publik.
