Reforma administrativo-territoriale u kthye në një tjetër pikë përplasjeje mes mazhorancës dhe opozitës në seancën plenare të Kuvendit.
Kryetari i Partisë Demokratike, Sali Berisha, akuzoi qeverinë se ka prishur dakordësinë mes palëve dhe po e çon përpara në mënyrë të njëanshme procesin e reformës. Sipas tij, ishte rënë dakord që Komisioni i Posaçëm të zgjaste afatin e punës dhe të pritej ekspertiza e Kongresit të Autoriteteve Rajonale dhe Lokale të Këshillit të Evropës, por, sipas Berishës, kryeministri Edi Rama urdhëroi ministrin Ervin Mazniku të vijonte procesin pa konsensus.
Berisha pretendoi gjithashtu se projekti i diskutuar nga mazhoranca parashikon shkrirjen e të paktën 20 bashkive në vend, duke përmendur mes tyre Krujën, Fushë-Arrëzin, Mirditën, Konispolin, Delvinën dhe Finiqin.
Akuzave iu përgjigj kreu i Grupit Parlamentar të Partisë Socialiste, Taulant Balla, i cili i cilësoi deklaratat e Berishës si dezinformim të opinionit publik.
Balla tha se Komisioni i Posaçëm për Reformën Administrativo-Territoriale ka përfunduar mandatin e tij, pasi nuk ka pasur një kërkesë të dakordësuar nga bashkëkryetarët për shtyrjen e afatit, ndërsa sqaroi se në seancën e 23 korrikut nuk do të ketë votim për reformën.
Sipas Ballës, në seancë do të paraqiten raportet e palëve dhe më pas procesi do të vijojë me konsultimet publike dhe shqyrtimin në Komisionin e Ligjeve, sipas afateve të parashikuara në ligj.
Kreu i grupit socialist hodhi poshtë edhe pretendimet se janë marrë vendime për shkrirjen e bashkive, duke i cilësuar si “lajme të rreme” informacionet që po qarkullojnë për një hartë të re territoriale.
