Ish-kryetari i Kuvendit të Kosovës dhe një nga ish-drejtuesit e Ushtrisë Çlirimtare të Kosovës, Jakup Krasniqi, po qëndron për të dytën ditë radhazi në shtëpinë e tij në Prishtinë, pasi është lejuar të udhëtojë përkohësisht nga Haga për arsye familjare.

Vizita e tij lidhet me gjendjen shëndetësore të bashkëshortes, e cila po përballet me probleme shëndetësore. Krasniqi është lejuar të qëndrojë pranë familjes në këto momente të vështira.

Sipas raportimeve të mediave kosovare, ish-kryeparlamentari mbërriti në Kosovë të mërkurën, më 18 nëntor, ndërsa edhe këtë të enjte ndodhet në banesën e tij në Prishtinë.

Kryeministri i Kosovës, Albin Kurti, ka reaguar publikisht për situatën, duke shprehur solidaritetin e tij me familjen Krasniqi.

“Është jashtëzakonisht e dhimbshme situata e rëndë në familjen e ish-kryekuvendarit, Jakup Krasniqi dhe në këto momente të vështira natyrisht që të gjithë bashkëndjejmë me vuajtjen edhe dhimbjen dhe urojmë që gjithçka të shkojë sa më mirë që është e mundur në një situatë kur ai u dënua me 25 vjet burg me gjithë ato pasaktësi historike e faktike, padyshim që të gjithë jemi pranë familjes Krasniqi”, deklaroi Kurti.

Kreu i qeverisë kosovare kritikoi gjithashtu vendimin gjyqësor ndaj Krasniqit, duke pretenduar se ai përmban pasaktësi historike dhe faktike.

Jakup Krasniqi është një nga ish-drejtuesit e UÇK-së që po përballet me procesin gjyqësor në Dhomat e Specializuara të Kosovës në Hagë.

Qëndrimi i tij në Kosovë është i përkohshëm dhe lidhet me rrethana të veçanta familjare, pa nënkuptuar ndryshim të statusit të tij juridik.

Ndërkohë, KOHA ka kërkuar informacione shtesë nga Dhomat e Specializuara lidhur me kushtet dhe kohëzgjatjen e vizitës, por deri në momentin e raportimit nuk kishte marrë përgjigje.

 

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu