Një mbrëmje e veçantë artistike bashkoi breza të ndryshëm përmes poezisë, muzikës dhe baletit, duke sjellë në skenë krijimtarinë e shkrimtarit që i dha zë jetës së përditshme, dashurisë, mallit dhe botës së njeriut të thjeshtë.
Aktiviteti nisi me një performancë baleti nga fëmijët e veshur me të bardha, të cilët interpretuan një koreografi të frymëzuar nga baleti klasik.
Më pas, vargjet e Dritëro Agollit u interpretuan nga aktorët Luiza Xhuvani dhe Vasjan Lami, ndërsa kompozimet e Gjergj Kaçinarit sollën një ndërthurje të poezisë me muzikën.
Një nga momentet më emocionuese të mbrëmjes ishte interpretimi i poezive të njohura të kthyera në këngë, mes tyre “Kur të jesh mërzitur shumë” dhe “Këtu s’do jem”.
Publiku iu bashkua artistëve duke kënduar, duke e kthyer aktivitetin në një festë të përbashkët të fjalës shqipe.
Në skenë u rikthyen edhe fëmijët, këtë herë të veshur me të kuqe, me një tjetër koreografi që i dha mbrëmjes ritëm dhe gjallëri.
Trashëgimia e Dritëroit, nga librat te brezat e rinj
Në qendër të kësaj nisme ishte edhe Fondacioni Kulturor “Dritëro Agolli”, i cili përmes projektit “Roots & Rhythms” synon të lidhë trashëgiminë letrare të shkrimtarit me format bashkëkohore të artit.
Projekti ndërthur gjuhën, kujtesën dhe rrënjët kulturore me muzikën, skenën dhe krijimtarinë e artistëve të rinj, me synimin që vepra e Agollit të vazhdojë të frymëzojë edhe brezat e ardhshëm.
Fondacioni shprehu mirënjohje për Bashkinë e Tiranës, Shtëpinë-Studio Agolli, Muse-X, artistët dhe bashkëpunëtorët që kontribuuan në organizimin e aktivitetit.
95 vite pas lindjes, Dritëro Agolli vazhdon të jetë i pranishëm jo vetëm përmes librave, por edhe përmes këngëve, interpretimeve dhe kujtimeve që bashkojnë lexuesit e tij.
Mbrëmja përkujtimore përcolli pikërisht mesazhin e vargjeve të tij: vlera e asaj që krijojmë qëndron edhe te drita që ndajmë me të tjerët.
