Sipas Komisionit Qendror të Zgjedhjeve, deri në orën 12:00, me orën lokale, kishin votuar 31.5% e qytetarëve me të drejtë vote, ose mbi 2.3 milionë persona. Kjo është pjesëmarrja më e lartë e regjistruar në këtë orë që prej vitit 1977.
Që në orët e para të mëngjesit, përpara qendrave të votimit u krijuan radhë të gjata. Deri në orën 10:00 kishin votuar 16.68% e zgjedhësve, niveli më i lartë për atë orë që nga viti 1981.
Zgjedhjet e sotme janë të parat që prej sulmit të Hamasit më 7 tetor 2023 dhe luftërave që pasuan në Gaza, Liban dhe Iran. Për shumë izraelitë, votimi është kthyer në një referendum për mënyrën se si Netanyahu e ka drejtuar vendin gjatë kësaj periudhe.
Kryeministri izraelit votoi në Jerusalem, i shoqëruar nga bashkëshortja Sara, duke e cilësuar momentin vendimtar për të ardhmen e vendit.
Netanyahu, drejtues i partisë së djathtë Likud dhe kryeministri më jetëgjatë në historinë e Izraelit, kërkon një mandat të ri në krye të qeverisë.
Rivali i tij kryesor është ish-shefi i ushtrisë, Gadi Eisenkot, i cili drejton partinë e qendrës Yashar dhe kërkon të formojë një koalicion alternativ.
Eisenkot votoi në Herzliya dhe u bëri thirrje qytetarëve të mos ndikohen nga mesazhet e frikës gjatë fushatës elektorale.
“Premtoj se do të bëj gjithçka për të qenë i denjë për besimin tuaj dhe për të sjellë një udhëheqje bashkuese”, deklaroi ai gjatë ditës së votimit.
Sondazhet e fundit tregojnë një garë të ngushtë, megjithëse rezultatet ndryshojnë ndjeshëm sipas instituteve që i kanë realizuar.
Sipas një sondazhi të televizionit izraelit Channel 12, partia Yashar e Eisenkotit renditej e para me 23 mandate, kundrejt 21 mandateve për Likud-in e Netanyahut.
Ndërkohë, një sondazh i Channel 14 paraqiste një rezultat të kundërt, duke i dhënë Likud-it 30 mandate dhe partisë së Eisenkotit rreth 20.
Megjithatë, fitimi i numrit më të madh të mandateve nuk garanton marrjen e pushtetit.
Parlamenti izraelit, Knesset, ka 120 vende dhe për formimin e qeverisë nevojitet mbështetja e të paktën 61 deputetëve. Asnjë parti nuk ka arritur ndonjëherë ta sigurojë e vetme këtë shumicë, duke e bërë të domosdoshëm krijimin e koalicioneve.
Një faktor vendimtar mund të jetë pjesëmarrja e qytetarëve arabë të Izraelit, të cilët përbëjnë rreth 20% të popullsisë. Mobilizimi i tyre mund të ndikojë në shpërndarjen e mandateve dhe në mundësinë e formimit të një qeverie pa Netanyahun.
Në këto zgjedhje, votuesit duhet të vendosin edhe për çështje të tjera që kanë shkaktuar debate të forta në shoqërinë izraelite, përfshirë përgjegjësinë për dështimet e sigurisë më 7 tetor, koston e jetesës dhe përjashtimet nga shërbimi i detyrueshëm ushtarak për hebrenjtë ultraortodoksë.
Qendrat e votimit pritet të mbyllen në orën 22:00, me orën lokale, kur televizionet izraelite do të publikojnë sondazhet e para pas votimit.
Por edhe nëse rezultatet tregojnë qartë se cila parti ka marrë më shumë mandate, identiteti i kryeministrit të ardhshëm mund të mbetet i paqartë për ditë ose javë, për shkak të negociatave të mundshme për formimin e koalicionit qeverisës.
Pjesëmarrja rekord tregon mobilizim të lartë të elektoratit, por nuk përcakton ende se cili prej dy blloqeve do të arrijë të formojë qeverinë e ardhshme.
