Një virus i njohur prej më shumë se 60 vitesh për infektimin e kafshëve është zbuluar për herë të parë edhe te njeriu. Autoritetet franceze kanë konfirmuar rastin e parë të infektimit njerëzor me virusin Shamonda, ndërsa pacienti, i cili vuante nga një sëmundje e rëndë, ka humbur jetën në fillim të tetorit 2026.
Organizata Botërore e Shëndetësisë (OBSH) ka publikuar më 22 tetor një informacion të posaçëm për virusin, mënyrën e përhapjes dhe rreziqet e mundshme për shëndetin e njerëzve.
Rasti është identifikuar në Francë, te një pacient që po trajtohej në spitalet universitare të Lionit. Sipas autoriteteve shëndetësore franceze, personi kishte një sistem imunitar shumë të dobësuar dhe po merrte trajtim për një sëmundje serioze.
Analizat laboratorike zbuluan praninë e virusit Shamonda në disa mostra biologjike, duke konfirmuar infektimin.
Pacienti kishte shfaqur edhe komplikacione neurologjike, të cilat mjekët dyshojnë se lidheshin me virusin. Megjithatë, ende nuk është përcaktuar nëse Shamonda ishte shkaku i vdekjes apo nëse kontribuoi në përkeqësimin e gjendjes shëndetësore.
Virusi Shamonda u identifikua për herë të parë në vitin 1965, te gjedhët në Nigeri. Më pas është zbuluar në disa vende afrikane dhe në Japoni, kryesisht te lopët, delet, dhitë dhe kuajt.
Deri në tetor të vitit 2026 nuk ishte dokumentuar asnjë rast infektimi te njerëzit.
Por këtë vit virusi është zbuluar për herë të parë edhe në Europë. Prania e tij është konfirmuar fillimisht te kafshët në Gjermani dhe Zvicër, ndërsa më pas edhe në Francë, Austri, Belgjikë dhe në vende të tjera europiane.
Sipas autoriteteve franceze, deri më 20 tetor virusi ishte identifikuar te gjedhët në 52 departamente të Francës, si dhe te disa dele dhe kuaj.
Shamonda i përket familjes Peribunyaviridae dhe gjinisë Orthobunyavirus. Ai është i afërt me virusin Schmallenberg, i njohur për ndikimin e tij te kafshët e fermave.
Përhapja mes kafshëve mendohet se ndodh përmes pickimeve të insekteve shumë të vogla të gjinisë Culicoides, të ngjashme me mizat e imëta.
Edhe për pacientin francez, hipoteza kryesore e hetuesve është infektimi përmes pickimit të një insekti të tillë në lindje të Francës. Megjithatë, kjo mënyrë transmetimi ende nuk është konfirmuar përfundimisht.
Te kafshët e infektuara, virusi mund të shkaktojë temperaturë, diarre, dobësi dhe ulje të prodhimit të qumështit. Në disa raste janë raportuar edhe probleme gjatë shtatzënisë dhe keqformime te pasardhësit.
Ndërsa te njerëzit, shkencëtarët kanë ende shumë pak informacion. Për shkak se është dokumentuar vetëm një rast, nuk është e mundur të përcaktohen simptomat tipike, as mënyra se si infeksioni mund të ndikojë te personat me sistem imunitar normal.
OBSH konfirmon gjithashtu se aktualisht nuk ekziston një vaksinë apo trajtim specifik kundër virusit Shamonda.
Megjithatë, autoritetet shëndetësore franceze dhe Qendra Europiane për Parandalimin dhe Kontrollin e Sëmundjeve (ECDC) theksojnë se deri tani nuk ka prova për transmetim nga njeriu te njeriu dhe nuk është identifikuar rrezik për popullatën e përgjithshme.
Kjo do të thotë se zbulimi i rastit të parë njerëzor nuk përbën, në vetvete, sinjal për një epidemi të re.
Franca ka njoftuar OBSH-në dhe institucionet europiane të shëndetit, ndërsa hetimet klinike dhe epidemiologjike po vijojnë për të përcaktuar se si ndodhi infektimi dhe çfarë rreziku real mund të paraqesë virusi për njerëzit.
ECDC po ndjek situatën në bashkëpunim me autoritetet franceze dhe laboratorët europianë, për të përmirësuar kapacitetet e identifikimit të rasteve të mundshme.
Rasti i Francës konsiderohet një zhvillim i rëndësishëm shkencor, pasi ndryshon njohuritë e mëparshme për një virus që për dekada ishte konsideruar si infeksion i kafshëve.
