Zyra e Përgjegjshmërisë së Policisë në Seattle ka nisur shqyrtimin paraprak të një ankese që lidhet me ish-shefin e policisë, Shon Barnes, i akuzuar nga studiuesit se nuk ka siguruar një vlerësim të plotë të materialeve të paraqitura për vdekjen e muzikantit.
Në qendër të debatit është një dosje voluminoze prej 180 faqesh, e përgatitur nga studiuesja Michelle Wilkins dhe ish-prokurori i qarkut King, Mark Larson.
Materiali përmban analiza mbi armën e zjarrit të gjetur pranë trupit të Cobain, rezultatet toksikologjike dhe njollat e mundshme të gjakut të evidentuara në fotografitë e vendit të ngjarjes.
Studiuesit pretendojnë se disa prej këtyre elementeve nuk përputhen me versionin zyrtar të vetëvrasjes dhe kërkojnë që çështja të shqyrtohet nga ekspertë të pavarur.
Një nga detajet më të pazakonta të kësaj historie lidhet me armën Remington, e cila, sipas dokumenteve të policisë të cituara nga studiuesit, është shkatërruar në shtator të vitit 2022.
Wilkins ngre pyetjen se si autoritetet mund të kenë vlerësuar pretendimet e reja balistike, kur arma origjinale nuk ishte më e disponueshme për ekzaminim fizik.
Studiuesja pretendon gjithashtu se drejtuesit e policisë nuk kanë shpjeguar se çfarë analizash konkrete janë kryer pas dorëzimit të dosjes.
Materialet iu paraqitën drejtuesve të policisë në nëntor të vitit 2025, ndërsa në janar 2026 autoritetet njoftuan se nuk kishte arsye për rihapjen e çështjes.
Ish-shefi i policisë Shon Barnes ka kundërshtuar pretendimet se gjatë takimeve kishte pranuar ekzistencën e mospërputhjeve në provat e hetimit fillestar.
Kurt Cobain u gjet i vdekur në shtëpinë e tij në Seattle, më 8 prill 1994, në moshën 27-vjeçare. Autoritetet përcaktuan se vdekja kishte ndodhur më 5 prill, si pasojë e një plage të shkaktuar vetë me armë zjarri.
Vdekja e tij shënoi një nga momentet më tragjike të historisë së muzikës rock, ndërsa rrethanat e ngjarjes kanë qenë për dekada objekt teorish dhe debatesh.
Megjithatë, Policia e Seattle dhe Zyra e Mjekësisë Ligjore kanë mbajtur të pandryshuar përfundimin zyrtar të vetëvrasjes, duke deklaruar se nuk janë paraqitur prova që justifikojnë rihapjen e hetimit.
Shqyrtimi aktual nuk është një hetim i ri për vdekjen e Cobain, por një procedurë që synon të përcaktojë nëse policia i ka trajtuar siç duhet materialet e reja të paraqitura nga studiuesit.
