Kryeministri Edi Rama ka reaguar pas incidentit me deputeten socialiste Iris Luarasi, e cila u përball me protestuesit teksa po shkonte drejt Parlamentit për seancën plenare.

Rama ka ripostuar në rrjetet sociale videon e momentit kur një grup protestuesish ndjekin nga pas Luarasin, ndërsa dëgjohen duke i drejtuar thirrjet “hajdute” dhe “kriminele”.

Kryeministri e ka shoqëruar videon vetëm me një koment të shkurtër, por të fortë:

“Çfarë mjerimi mendor!”, shkruan Rama.

Incidenti ndodhi gjatë protestës së zhvilluar këtë të martë pranë Parlamentit, në ditën e nisjes së sesionit të ri parlamentar.

Për ngjarjen kishte reaguar më herët edhe Albana Koçiu, e cila e cilësoi sjelljen ndaj Luarasit “dhunë të mirëfilltë dhe të shëmtuar”, duke deklaruar se ajo nuk mund të justifikohet si protestë apo zemërim qytetar.