Kryetari i Grupit Parlamentar të Partisë Socialiste, Taulant Balla, kërkoi në Kuvend miratimin me procedurë të përshpejtuar të marrëveshjes së huasë mes Shqipërisë dhe Shteteve të Bashkuara të Amerikës, me vlerë 302 milionë dollarë, për modernizimin e Forcave të Armatosura.
Gjatë fjalës së tij, Balla e cilësoi marrëveshjen si historike dhe një dëshmi të besimit që SHBA ka ndaj Shqipërisë si aleate në NATO.
Sipas tij, financimi do të përdoret për blerjen e pajisjeve, sistemeve dhe shërbimeve ushtarake përmes programit amerikan “Foreign Military Sales”, sipas standardeve të Aleancës.
Balla theksoi se buxheti i mbrojtjes është rritur nga 24.1 miliardë lekë në vitin 2020 në 69.2 miliardë lekë në vitin 2026, ndërsa Shqipëria synon të arrijë objektivin e NATO-s për shpenzime në mbrojtje sa 5% e Prodhimit të Brendshëm Bruto deri në vitin 2035.
Ai nënvizoi se organizimi i Samitit të NATO-s në Tiranë është një vlerësim i rëndësishëm për rolin e Shqipërisë në Aleancë, ndërsa vendi po hyn në një fazë të re investimesh strategjike për forcimin e kapaciteteve mbrojtëse.
Sipas Ballës, kredia do të disbursohet vetëm sipas nevojave të Ministrisë së Mbrojtjes dhe nën mbikëqyrjen e Agjencisë Amerikane për Bashkëpunimin në Sigurinë e Mbrojtjes, duke garantuar transparencë të plotë në përdorimin e fondeve.
Në përfundim, ai u bëri thirrje deputetëve të miratojnë marrëveshjen me procedurë të përshpejtuar, duke argumentuar se ajo forcon partneritetin strategjik me Shtetet e Bashkuara, rrit kapacitetet e mbrojtjes dhe konsolidon pozicionin e Shqipërisë si një aleate e besueshme e NATO-s.
